کوئٹہ میں دھماکوں کا منصوبہ ناکام، اسلحہ و بارود کا بڑا ذخیرہ برآمد

‏کوئٹہ (نمائندہ ڈیلی اردو) کاؤنٹر ٹیررازم ڈیپارٹمنٹ (سی ٹی ڈی) کی جانب سے بلوچستان کے دارالحکومت کوئٹہ میں کامیاب کارروائی کرکے شہر کو بڑی دہشت گردی سے بچالیا۔

ڈیلی اردو کے مطابق ترجمان سی ٹی ڈی کی جانب سے جاری بیان میں کہا گیا کہ کوئٹہ کو خطرناک دہشت گردی سے بچا لیا گیا ہے۔

سی ٹی ڈی بلوچستان کے مطابق کاؤنٹر ٹیرر ازم ڈیپارٹمنٹ نے مقامی و انٹیلیجینس لیڈ پر پیشگی کارروائی کی، انٹیلیجینس لیڈ نے مشکوک نقل و حرکت اور اسلحہ و بارود اسٹوریج کی طرف اشارہ دیا۔

ترجمان کا کہنا تھا کہا کہ سی ٹی ڈی نے کوئٹہ کے سریاب روڈ ایریا سے اسلحہ اور گولہ بارود کا بڑا ذخیرہ برآمد کرلیا، ذخیرے میں آئی ای ڈیز، خودکار ہتھیار، دستی بم، اور مختلف قسم کا گولہ بارود شامل ہے۔

سی ٹی ڈی بلوچستان نے بتایا کہ ڈیپارٹمنٹ کے فوری ردعمل اور پیشہ ورانہ عمل نے ایک تباہ کن حملے کو موثر طریقے سے روک دیا ہے۔

سی ٹی ڈی بلوچستان کا کہنا تھا کہ ابتدائی تحقیقات کے مطابق دہشت گرد آئندہ 24 سے 72 گھنٹوں میں بڑے دہشت گردانہ حملے کی منصوبہ بندی کر رہے تھے۔

ترجمان نے مزید بتایا کہ موقع پر کوئی دہشت گرد موجود نہیں تھا لیکن نا معلوم ملزمان کی گرفتاری کے لیے چھاپے مارے جا رہے ہیں جب کہ بلوچستان کا امن خراب کرنے کی کسی کو اجازت نہیں دی جائے گی۔