کوئٹہ میں سڑک کنارے گاڑی کے قریب دھماکا، پی ایم ڈی سی کا پروجیکٹ منیجر ہلاک

کوئٹہ (ڈیلی اردو) صوبہ بلوچستان کے صوبائی حکومت کوئٹہ کے نواحی علاقے سورینج میں پاکستان منرل ڈیولپمنٹ کارپوریشن (پی ایم ڈی سی) کے پروجیکٹ منیجر کی گاڑی کو سڑک کنارے نصب بم سے نشانہ بنایا گیا جس کے نتیجے میں منیجر ہلاک اور ڈرائیور شدید زخمی ہو گیا۔

نجی ٹی وی چینل ڈان نیوز سے بات کرتے ہوئے کوئٹہ کے ایس ایس پی (آپریشنز) جواد طارق نے واقعے کی تصدیق کی اور ہلاک عہدیدار کی شناخت شابات رضوی کے نام سے کی۔

ایس ایس پی نے کہا کہ پی ایم ڈی سی کے عہدیدار اپنے ڈرائیور محمد ذاکر کے ساتھ جا رہے تھے کہ دھماکا ہوگیا جس کے نتیجے میں شابات رضوی موقع پر دم توڑ گئے جبکہ ان کے ڈرائیور شدید زخمی ہوگئے۔

ایس ایس پی نے کہا کہ زخمی ڈرائیور کو فوری طور پر کوئٹہ سول ہسپتال کے ٹراما سینٹر منتقل کردیا گیا۔

پولیس افسر نے کہا کہ ابتدائی تفتیش کے مطابق بم کو روڈ کے قریب نصب کیا گیا تھا جہاں محکمہ انسداد دہشت گردی نے جائے وقوع کو بند کرکے ثبوت اکٹھا کرنا شروع کردیے ہیں۔

انہوں نے کہا کہ سور رینج پہاڑی علاقے میں واقع ہے اور سی ٹی ڈی کے حکام مزید معلومات کے لیے مقامی افراد سے تفتیش کر رہے ہیں۔

دوسری جانب کالعدم تنظیم بلوچ لبریشن آرمی نے مذکورہ حملے کی ذمہ داری قبول کرلی ہے۔

خیال رہے کہ گزشتہ چند ماہ کے دوران بلوچستان اور خیبرپختونخوا میں دہشت گردی کے واقعات اور شدت پسندوں کے حملوں میں خاطر خواہ اضافہ ہوا ہے۔

گزشتہ ماہ مستونگ میں 12 ربیع الاول کے موقع پر نکالی جانے والی ریلی میں خودکش بم دھماکے کے نتیجے میں 59 افراد ہلاک ہوگئے تھے۔

واقعے کے بعد حکومت بلوچستان نے دہشت گردوں کے خلاف ’جنگ‘ کا اعلان کیا تھا۔