کوئٹہ میں سی ڈی ٹی کی کارروائی، تحریک طالبان پاکستان کے 4 دہشت گرد ہلاک، 2 فرار

کوئٹہ (نمائندہ ڈیلی اردو) صوبہ بلوچستان کے صوبائی دارالحکومت کوئٹہ میں کاؤنٹر ٹیررازم ڈیپارٹمنٹ (سی ٹی ڈی) کی کارروائی میں 4 مبینہ دہشتگرد ہلاک ہوگئے۔

ذرائع کے مطابق کوئٹہ کے نواحی علاقے اغبرگ میں خفیہ اطلاع ملنے پر سی ٹی ڈی فورس سمیت دیگر سکیورٹی فورسز نے دہشت گردوں کی موجودگی پر سرچ آپریشن کیا، کئی گھنٹے جاری رہنے والے آپریشن کے بعد دہشتگردوں کے زیر استعمال کمپاونڈکی تلاشی کا عمل مکمل کرلیا گیا۔

سی ٹی ڈی ترجمان کے مطابق آپریشن کے دوران سکیورٹی فورسز اور دہشت گردوں کے درمیان فائرنگ کاتبادلے میں چار مبینہ دہشتگرد ہلاک ہو گئے، جن کی شناخت پشین سے تعلق رکھنے والے سیمع اللہ اور سراج الدین، مطیع اللہ مستونگ اور جنوبی وزیرستان سے تعلق رکھنے والے فضل الرحمٰن کے نام سے ہوئی’۔ مبینہ دہشتگردوں کے زیر استعمال کمپاونڈ سے اسلحہ و گولہ بارود برآمد کیا گیا۔ ہلاک دہشتگردوں کا تعلق کالعدم تنظیم تحریک طالبان پاکستان بتایا جاتا ہے۔

سی ڈی ٹی کے ترجمان کی جانب سے دو دہشت گردوں کے فرار ہونے کا دعویٰ بھی کیا گیا ہے۔

سی ٹی ڈی ترجمان کے مطابق مبینہ دہشتگرد فورسز پر حملوں میں ملوث رہے ہیں اور کوئٹہ میں مزید دہشتگردانہ کارروائیوں کیلئے اکٹھے ہوئے تھے جو سکیورٹی فورسز کی کامیاب کارروائی کے بعد ناکام بنادی گئی، سکیورٹی فورسز نے علاقے کو گھیرے میں لیکر مزید تحقیقات شروع کردی ہے۔