کوئٹہ ہزار گنجی دھماکا: خودکش بمبار کی شناخت ہو گئی، اہم گرفتاریاں متوقع

کوئٹہ (مانیٹرنگ ڈیسک) صوبہ بلوچستان کے صوبائی دارالحکومت کوئٹہ کے علاقے ہزار گنجی میں رواں سال رمضان المبارک میں ہونے والے خود کش حملے کے ملزم کی شناخت ہو گئی، حملہ آور کا تعلق نوشکی سے بتایا جاتا ہے۔

سی ٹی ڈی کے ترجمان کے مطابق ہزار گنجی خودکش حملے کی تحقیقات میں اہم پیش رفت ہوئی ہے، خودکش حملے میں خود کو دھماکے سے اڑانے والے نوشکی کے نوجوان کی شناخت اسامہ ولد بشیر احمد کے نام سے ہوئی ہے۔

حملہ آور اسامہ کی شناخت ڈی این اے ٹیسٹ کے ذریعے عمل میں آئی ہے۔

سیکیورٹی ذرائع کا کہنا ہے کہ خودکش حملہ آور کا تعلق عالمی دہشت گرد تنظیم داعش سے تھا۔

کوئٹہ کے علاقے ہزار گنجی میں رواں سال رمضان المبارک میں 13 اپریل کو خودکش حملہ کیا گیا تھا، جس کے نتیجے میں پولیس اور ایف سی کے اہلکاروں سمیت 20 افراد شہید جبکہ 32 زخمی ہوئے تھے۔ شہدا میں 12 کا تعلق شیعہ ہزارہ سے تھا۔

سی ٹی ڈی ترجمان نے دعویٰ کیا ہے کہ واقعے میں گرفتاریاں متوقع ہیں، ملزم کا قریبی عزیز اور داعش کا کمانڈر جمیل احمد منیگل عرف سیف اللہ سریاب روڈ پر پولیس مقابلے میں مارا گیا تھا۔