گنیش وسرجن جلوس: 14 پاکستانی دہشت گرد ممبئی میں داخل، سکیورٹی الرٹ

نئی دہلی (ڈیلی اردو) بھارت کے سب سے بڑے شہر ممبئی میں ایک دھمکی کے بعد سکیورٹی ہائی الرٹ کر دیا گیا ہے۔ 

ممبئی پولیس کے مطابق وٹس ایپ پر موصول ہونے والی دھمکی ’لشکر جہادی‘ نامی تنظیم کی جانب سے بھیجی گئی، جس میں کہا گیا کہ 14 پاکستانی دہشت گرد شہر میں داخل ہو چکے ہیں۔

دھمکی میں مزید کہا گیا کہ 34 گاڑیاں انسانی بموں سے لیس ہیں اور شہر میں ایسے دھماکے ہوں گے جو ممبئی کو ہلا کر رکھ دیں گے۔ پیغام میں دعویٰ کیا گیا کہ دھماکوں میں 400 کلو گرام آر ڈی ایکس استعمال کیا جائے گا۔

خصوصی بات یہ ہے کہ یہ دھمکی گنیش وسارجن کے موقع پر موصول ہوئی، جب لاکھوں افراد شہر کی سڑکوں پر موجود ہوں گے۔ ممبئی پولیس حکام کا کہنا ہے کہ شہر میں سکیورٹی بڑھا دی گئی ہے اور دھمکی کی تحقیقات جاری ہیں۔

یاد رہے کہ 26 نومبر 2008 کو ممبئی میں دہشت گرد حملوں اور بم دھماکوں میں 150 سے زائد افراد ہلاک اور درجنوں زخمی ہوئے تھے۔ انڈیا نے اس کا الزام پاکستان پر لگایا تھا، تاہم اسلام آباد نے ہمیشہ ان الزامات کو مسترد کیا ہے۔