ہنگو: پولیس چیک پوسٹ پر حملہ، جوابی کارروائی میں حملہ آور ہلاک

ہنگو (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع ہنگو میں مسلح افراد نے پولیس چیک پوسٹ پر حملہ کردیا، پولیس کی جوابی کارروائی میں حملہ آور ہلاک ہوگیا۔

پولیس کے مطابق فائرنگ کے تبادلے میں ایک اہلکار زخمی ہوا جسے علاج کے لیے پشاور منتقل کردیا گیا۔ پولیس جوانوں نے بہادری سے مقابلہ کرتے ہوئے حملہ آور کو ہلاک کیا۔

پولیس حکام کے مطابق جمعہ کے روز ہنگو میں بم دھماکے میں سپرنٹنڈنٹ پولیس (ایس پی) آپریشنز اسد زبیر آفریدی سمیت تین اہلکار ہلاک ہوئے تھے۔

آئی جی خیبرپختونخوا ذوالفقار حمید نے بتایا کہ دھماکے میں ایس پی اسد زبیر کی گاڑی کو نشانہ بنایا گیا، جس سے پولیس موبائل الٹ گئی۔ 

ڈی ایس پی امجد حسین کے مطابق دہشت گردوں نے بلیامینہ میں ایک خالی چیک پوسٹ کو دھماکے سے اڑا دیا، جس کی اطلاع پر ایس پی آپریشنز اسد زبیر موقع پر پہنچے، اور اسی دوران دوسرا دھماکا ہوا جس میں ایس پی اور دو پولیس اہلکار ہلاک ہوگئے۔

ذرائع نے بتایا کہ ایس پی اسد زبیر کے پاس حساس مقام پر جانے کے لیے بلٹ پروف گاڑی موجود نہیں تھی، جس کے باعث اُن کی گاڑی آئی ای ڈی دھماکے سے متاثر ہوئی۔ 

ذرائع کے مطابق ضلع ہنگو کو حساسیت کے باوجود صرف ایک بلٹ پروف گاڑی فراہم کی گئی ہے جو ڈی پی او کے زیر استعمال ہے، جبکہ ڈی ایس پی سطح تک بلٹ پروف گاڑیوں کی اشد ضرورت ہے۔

قربانی کے انسانی پہلو کو اجاگر کرتے ہوئے بتایا گیا کہ اسد زبیر آفریدی کا تعلق ایک ایسے خاندان سے تھا جس نے امن و امان کے لیے مسلسل قربانیاں دیں۔ ان کے والد اورنگ زیب آفریدی اور دادا شہاب الدین آفریدی بھی فرائض کی انجام دہی کے دوران ہلاک ہوچکے تھے۔

ذرائع نے مزید بتایا کہ اسی علاقے میں ماضی میں ایک ایس ایچ او کو بھی نشانہ بنایا گیا تھا، جبکہ ڈی پی او ہنگو پر بھی حملے کی کوشش ہوچکی ہے۔

اس حوالے سے ترجمان پی ٹی آئی خیبرپختونخوا عدیل اقبال نے نجی ٹی وی چینل جیو نیوز سے گفتگو میں کہا کہ صوبائی حکومت نے پولیس کو جدید اسلحہ اور گاڑیوں سے لیس کیا ہے، اور مزید بلٹ پروف گاڑیاں اُن اضلاع کو فراہم کی جائیں گی جہاں ضرورت ہے۔