یمن: حوثیوں نے اقوام متحدہ کے اہلکاروں کو امریکہ و اسرائیل کا جاسوس قرار دے دیا

صنعاء (ڈیلی اردو/اے ایف پی/ڈی پی اے) یمن کے دارالحکومت صنعاء سے جمعرات چار ستمبر کو موصولہ رپورٹوں میں بتایا گیا کہ ایران نواز حوثی باغیوں کی انتظامیہ کے ایک اہلکار کے مطابق اقوام متحدہ کے سٹاف کے رکن جن کم از کم 11 افراد کو گزشتہ ویک اینڈ پر گرفتار کیا گیا، ان پر شبہ ہے کہ وہ یمن میں امریکہ اور اسرائیل کے لیے جاسوسی کرتے تھے۔

ان کارکنوں کو اتوار 31 اگست کے روز گرفتار کیا گیا۔ یہ گرفتاریاں گزشتہ جمعرات کے دن اسرائیل کے یمن میں ایک بڑے فضائی حملے کے بعد عمل میں آئی تھیں۔

اس حملے میں حوثیوں کی حکومت کے وزیر اعظم احمد غالب الرہوی، ان کی کابینہ کے نو وزیر اور دو کابینہ اہلکار ہلاک ہو گئے تھے۔ یہ پہلا موقع تھا کہ یمن میں ایران نواز حوثیوں کے خلاف اسرائیل کے کسی فضائی حملے میں اتنی بڑی تعداد میں انتہائی سرکردہ شخصیات ہلاک ہوئی تھیں۔

حوثی باغیوں کی انتظامیہ کے جس سرکردہ اہلکار نے جمعرات کو اے ایف پی کے ساتھ بات کی، اس نے اپنی شناخت خفیہ رکھے جانے کی درخواست اس لیے کی کہ وہ میڈیا سے گفتگو کرنے کا مجاز نہیں تھا۔

اس اہلکار نے اے ایف پی کو بتایا، ''جن افراد کو گرفتار کیا گیا ہے، وہ اقوام متحدہ کے لیے کام کرنے والے عملے کے رکن ہیں اور ان پر الزام ہے کہ وہ امریکہ اور اسرائیل کے لیے جاسوسی کرتے تھے۔‘‘

ساتھ ہی اس حوثی اہلکار نے کہا، ''ان زیر حراست افراد میں سے جس جس کے خلاف بھی الزامات کی تصدیق ہو گئی، اس کے خلاف مقدمے کی سماعت شروع کر دی جائے گی۔‘‘

نیوز ایجنسی اے ایف پی نے لکھا ہے کہ حوثی باغیوں نے اقوام متحدہ کے عملے کے جن ارکان کو گرفتار کیا ہے، ان میں عالمی خوراک پروگرام اور اقوام متحدہ کے بچوں کے امدادی ادارے یونیسیف کے ورکر شامل ہیں۔ یہ دونوں ادارے جنگ زدہ یمن میں بچوں کے لیے امداد فراہم کرتے ہیں۔

اسی دوران ایک دوسرے یمنی سکیورٹی ذریعے نے اے ایف پی کو بتایا کہ گزشتہ ہفتے کے روز بھی درجنوں دیگر افراد کو ''اسرائیل کے ساتھ ملی بھگت‘‘ کے شبے میں گرفتار کر لیا گیا تھا۔

اتوار کے روز اقوام متحدہ کے کارکنوں کی گرفتاریوں سے قبل بھی اس عالمی ادارے کے 23 ایسے کارکن حوثیوں کے قبضے میں تھے، جنہیں 2021ء میں یا اس کے بعد گرفتار کیا گیا تھا۔