اتحادی مدد نہ کریں تو نیٹو کا مستقبل ’بہت برا‘ ہوگا، امریکی صدر ٹرمپ

واشنگٹن (ڈیلی اردو ) امریکی صدر ڈونلڈ ٹرمپ نے خبردار کیا ہے کہ اگر اتحادی ممالک امریکہ کی مدد نہ کریں تو نیٹو کا مستقبل ’’بہت برا‘‘ ہو سکتا ہے۔ 

برطانوی اخبار فنانشل ٹائمز کو دیے گئے ایک انٹرویو میں انہوں نے کہا کہ وہ دیکھیں گے کہ اتحادی ممالک امریکہ کی مدد کرتے ہیں یا نہیں۔ ان کے بقول وہ طویل عرصے سے کہتے آئے ہیں کہ امریکہ اپنے اتحادیوں کے لیے موجود رہتا ہے لیکن اتحادی اکثر امریکہ کے لیے اسی طرح آگے نہیں آتے۔

ٹرمپ نے ایک بار پھر آبنائے ہرمز میں اتحادیوں سے مدد کا مطالبہ کیا۔ ان کا کہنا تھا کہ اس راستے سے فائدہ اٹھانے والے ممالک کو بھی اس کی حفاظت کے لیے کردار ادا کرنا چاہیے۔

اس سے قبل وہ برطانیہ، چین، فرانس، جاپان اور جنوبی کوریا سے مطالبہ کر چکے ہیں کہ وہ اس اہم بحری راستے کے تحفظ کے لیے اپنے بحری جہاز بھیجیں۔

ٹرمپ نے برطانوی وزیر اعظم کیئر سٹارمر کے اس فیصلے پر بھی تنقید کی جس کے تحت ایران پر ابتدائی حملوں کے دوران امریکہ کو برطانیہ کے فوجی اڈے استعمال کرنے کی اجازت نہیں دی گئی تھی۔ ان کا کہنا تھا کہ برطانیہ کو امریکہ کا سب سے پرانا اور اہم اتحادی سمجھا جاتا ہے، لیکن جب انہوں نے مدد مانگی تو برطانیہ نے حصہ لینے سے انکار کر دیا۔

انہوں نے ایک بار پھر کہا کہ ان کے خیال میں نیٹو طویل عرصے سے یک طرفہ تعلق بن کر رہ گیا ہے۔