ٹانک : تھانے پر مبینہ ڈرون حملہ اور فائرنگ، محرر سمیت 3 پولیس اہلکار زخمی

ٹانک (ڈیلی اردو) خیبرپختونخوا کے شورش زدہ ضلع ٹانک میں تھانہ ملازئی پر مبینہ ڈرون حملے اور فائرنگ کے نتیجے میں محرر سمیت تین پولیس اہلکار زخمی ہوگئے۔

ذرائع کے مطابق تھانہ ملازئی کو پہلے مبینہ ڈرون حملے کا نشانہ بنایا گیا، جس کے بعد نامعلوم سمت سے شدید فائرنگ کی گئی۔ واقعے میں محرر ہیڈ کانسٹیبل علی اللہ، کانسٹیبل عدنان اور کانسٹیبل سیف علی زخمی ہوئے۔

زخمی اہلکاروں کو فوری طور پر طبی امداد کے لیے قریبی اسپتال منتقل کردیا گیا، جہاں انہیں علاج فراہم کیا جا رہا ہے۔

واقعے کے بعد پولیس اور سکیورٹی فورسز نے علاقے کو گھیرے میں لے کر جوابی کارروائی شروع کردی۔ تاہم حملے میں استعمال ہونے والے ڈرون کی نوعیت، فائرنگ کرنے والوں کی شناخت اور واقعے کے محرکات سے متعلق تفصیلات تاحال سامنے نہیں آسکیں۔