اسرائیل اور لبنان میں دس روزہ جنگ بندی پر اتفاق، امریکی صدر ٹرمپ

واشنگٹن (ڈیلی اردو، اے پی، اے ایف پی، روئٹرز) امریکی صدر ڈونلڈ ٹرمپ نے اسرائیل اور لبنان کے مابین جنگ میں دس روزہ فائر بندی کا اعلان کر دیا۔ ٹرمپ نے کہا کہ انہوں نے اسرائیلی وزیر اعظم نیتن یاہو اور لبنانی صدر جوزف عون کے ساتھ بات کی، جو بہت اچھی رہی۔

واشنگٹن سے موصولہ رپورٹوں کے مطابق صدر ڈونلڈ ٹرمپ نے ٹروتھ سوشل پر اپنی ایک پوسٹ میں مغربی یورپی وقت کے مطابق جمعرات کی شام لکھا کہ اسرائیل اور لبنان کے رہنما جنگ میں 10 دن کی فائر بندی پر متفق ہو گئے ہیں۔

امریکی صدر نے یہ نہیں لکھا کہ یہ سیزفائر کس دن شروع ہونا تھی۔ انہوں نے صرف اتنا لکھا کہ یہ جنگ بندی شام پانچ بجے (عالمی وقت کے مطابق رات نو بجے) شروع ہو گی۔

اس پوسٹ میں دن کا تعین کیے بغیر وقت لکھے جانے کے باعث مختلف نیوز ایجنسیوں کے مطابق اس سے مراد یہ ہے کہ ڈونلڈ ٹرمپ کے بقول اسرائیلی اور لبنانی رہنماؤں نے اس سیزفائر پر جمعرات 16 اپریل کی شام ہی عمل درآمد پر اتفاق کیا ہے۔

امریکہ کے صدر نے لکھا، ’’میری اسرائیلی وزیر اعظم بینجمن نیتن یاہو اور لبنان کے صدر جوزف عون سے بات ہوئی ہے، جو ’’بہت شاندار‘‘ رہی۔ ڈونلڈ ٹرمپ نے اپنی پوسٹ میں لکھا کہ ان کی ’’شاندار گفتگوئیں‘‘ ہوئیں۔ اس سے یہ مراد لی جا سکتی ہے کہ امریکی صدر نے بینجمن نیتن یاہو اور جوزف عون سے علیحدہ علیحدہ بات چیت کی۔

ڈونلڈ ٹرمپ کے مطابق انہوں نے نائب صدر جے ڈی وینس، امریکی وزیر خارجہ مارکو روبیو اور جوائنٹ چیفس آف سٹاف کے چیئرمین ڈین کین کو ہدایت کی ہے کہ وہ ان دونوں ممالک کے ساتھ ملکر کام کریں اور اسرائیل اور لبنان کے مابین دیرپا امن کی منزل کے حصول میں مدد کریں۔

امریکی صدر نے یہ بھی لکھا کہ انہوں نے اسرائیلی اور لبنانی رہنماؤں کو وائٹ ہاؤس آنے کی دعوت بھی دی ہے تاکہ ان دونوں ہمسایہ ممالک کے مابین 1983ء سے لے کر آج تک کے اولین اعلیٰ سطحی سیاسی رابطے ممکن ہو سکیں۔