لاہور : سی ٹی ڈی ہیڈکوارٹرز کے قریب مشتبہ ڈرون گر کر تباہ، جاسوسی کی کوشش کا شبہ

لاہور(ڈیلی اردو) صوبائی دارالحکومت لاہور میں کاؤنٹر ٹیررازم ڈیپارٹمنٹ (سی ٹی ڈی) کے ہیڈکوارٹرز کی بیرونی دیوار سے ایک جدید نگرانی کرنے والا ڈرون ٹکرا کر گر گیا، جس کے بعد سکیورٹی حکام نے تحقیقات شروع کر دی ہیں۔ پولیس کو شبہ ہے کہ ڈرون کے ذریعے حساس عمارت کی نگرانی اور اندرونی حصوں کی ریکی کی جا رہی تھی، تاہم اس کے آپریٹرز اور اصل مقصد کی تاحال تصدیق نہیں ہو سکی۔

پولیس حکام کے مطابق واقعہ ہفتے اور اتوار کی درمیانی شب تقریباً ساڑھے بارہ بجے پیش آیا۔ ڈرون جلو موڑ کی سمت سے سی ٹی ڈی ہیڈکوارٹرز کی جانب آیا اور عمارت کی بیرونی دیوار سے ٹکرانے کے بعد نیچے گر گیا۔ ابتدائی معلومات کے مطابق ڈرون پر نصب کیمرے اور بیٹری کی روشنیاں گرنے کے وقت بھی فعال تھیں۔

واقعے کے بعد سی ٹی ڈی کی سکیورٹی ٹیم نے ڈرون اپنی تحویل میں لے لیا، جبکہ بم ڈسپوزل اسکواڈ نے اس کا تفصیلی معائنہ کرنے کے بعد اسے محفوظ قرار دے دیا۔ ابتدائی اطلاعات میں ڈرون پر دھماکہ خیز مواد کی موجودگی کی تصدیق نہیں ہوئی۔

پولیس کا شبہ ہے کہ نامعلوم افراد نے مبینہ طور پر دہشتگردی یا جاسوسی کی غرض سے ڈرون حساس سرکاری عمارت کی جانب بھیجا تھا۔ تاہم حکام نے تاحال یہ واضح نہیں کیا کہ ڈرون کو عمارت سے ٹکرانے کے لیے جان بوجھ کر بھیجا گیا یا یہ کسی تکنیکی خرابی کے باعث حادثے کا شکار ہوا۔

سی ٹی ڈی ہیڈکوارٹرز کی سکیورٹی ٹیم نے قانونی کارروائی کے لیے تھانہ ہربنس پورہ میں درخواست جمع کرا دی ہے، جبکہ پولیس واقعے کے مختلف پہلوؤں کا جائزہ لے رہی ہے۔ تحقیقات میں ڈرون کی ساخت، اس میں نصب آلات اور اسے اڑانے والے نامعلوم افراد کا سراغ لگانے کی کوشش بھی شامل ہے۔

دوسری جانب پنجاب میں سکیورٹی خدشات کے پیش نظر کھلے مقامات پر ڈرون اڑانے پر عائد پابندی میں مزید 30 روز کی توسیع کی اطلاع بھی سامنے آئی ہے۔ حکام کے مطابق اس پابندی کا مقصد عوامی تحفظ، امن و امان اور سرکاری و نجی املاک کی حفاظت یقینی بنانا ہے۔

تاحال اس واقعے کو کسی دہشتگرد تنظیم یا مخصوص گروہ سے منسوب نہیں کیا گیا اور نہ ہی کسی جانب سے اس کی ذمہ داری قبول کرنے کی اطلاع ہے۔ تحقیقات مکمل ہونے کے بعد ہی ڈرون کے مقصد اور اس کے پیچھے موجود عناصر کے بارے میں صورتِ حال واضح ہو سکے گی۔