اسلام آباد میں دہشت گردوں کی فائرنگ، پولیس آفیسر سمیت 2 اہلکار ہلاک

اسلام آباد (ش ح ط) اسلام آباد میں تھانہ ترنول کی حدود میں دہشت گردوں کی پولیس ناکے پر فائرنگ سے اے ایس آئی سمیت دو اہلکار ہلاک ہوگئے۔

پولیس کے مطابق واقعہ تھانہ ترنول کے علاقے میں پیش آیا جہاں چونگی نمبر 26 پر ناکہ بندی کے دوران تلاشی کے غرض سے موٹر سائیکل سواروں کو روکنے کا اشارہ کیا تو انہوں نے پولیس اہلکار پر گولیاں چلادیں۔

ترنول کے علاقہ 26 نمبر چونگی ناکہ پر تعینات جوانوں پر نامعلوم ملزمان کی فائرنگ سے ASI محسن ظفر اور ہیڈ کنسٹیبل سجاد شہید ہوگئے.
انا للہ وانا الیہ راجعون
آئی جی اسلام آباد محمد عامر ذوالفقار خان نے وقوعہ کا نوٹس لے لیا۔
Cont… pic.twitter.com/2uqH1UtGHz

— Islamabad Police (@ICT_Police) May 26, 2020

پولیس کا کہنا ہے کہ دہشت گردوں کی فائرنگ سے دو اہلکار موقع پر ہی ہلاک ہوگئے۔

پولیس ذرائع کے مطابق نامعلوم مسلح افراد کی فائرنگ سے ہلاک ہونے والوں میں اے ایس آئی محسن ظفر اور ہیڈ کانسٹیبل سجاد شامل ہیں۔

ملزموں کی گرفتاری کیلئے شہر بھر میں ناکہ بندی کردی گئی ہے۔ جائے حادثہ کو بھی سیل کر دیا گیا ہے اور ابتدائی تحقیقات شروع کر دی ہیں۔

آئی جی پولیس اسلام آباد نے فائرنگ کا نوٹس لیتے ہوئے فوری طور پر فائرنگ کے واقع کی تحقیقات اور دہشتگردوں کی گرفتاری کیلئے ‏ڈی آئی جی آپریشنز وقار الدین سید کی سربراہی میں دو سپیشل انوسٹی گیشن ٹیمیں تشکیل دے دی ہیں۔

دریں اثناء کالعدم تنظیم ‘جماعت الاحرار’ کے ترجمان ڈاکٹر عزیز یوسف زئی نے ڈیلی اردو کو ای میل کر کے واقعہ کی ذمہ داری قبول کی ہے۔

ترجمان نے بیان میں کہا ہے کہ حملہ ان کی تنظیم کے ٹارگٹ کلرز نے کیا۔