امریکہ: یہودی عبادت گاہ سمیت دو دہشت گرد حملے، لیفٹیننٹ کرنل ہلاک، 4 زخمی

واشنگٹن (ڈیلی اردو رپورٹ) امریکہ میں جمعرات کو پیش آنے والے دو الگ الگ دہشت گرد حملوں میں لیفٹیننٹ کرنل برینڈن شاہ ہلاک جبکہ چار افراد زخمی ہو گئے۔

رپورٹس کے مطابق دونوں حملوں میں ملوث دہشت گرد تارکینِ وطن تھے۔ ایک حملہ آور کی شناخت محمد جالوہ کے نام سے ہوئی ہے جو سیرا لیون سے تعلق رکھتا ہے، جبکہ دوسرے حملہ آور کی شناخت ایمن غزالیہ کے نام سے ہوئی ہے جو لبنان سے تعلق رکھنے والا تارکِ وطن بتایا جاتا ہے۔

اطلاعات کے مطابق یہ حملے مشی گن اور ورجینیا کی ریاستوں میں پیش آئے۔

ادھر مشی گن میں یہودی عبادت گاہ ٹیپل اسرائیل پر حملہ ہوا، جس میں مشتبہ حملہ آور ہلاک اور ایک سکیورٹی گارڈ زخمی ہوا، جبکہ پری اسکول کے طلبہ اور عملہ محفوظ رہے۔ 

ورجینیا کی اولڈ ڈومینین یونیورسٹی میں اندھادھن فائرنگ کے واقعے میں لیفٹیننٹ کرنل برینڈن شاہ ہلاک اور دو زخمی ہوئے، بعد میں حملہ آور بھی ہلاک کر دیا گیا۔

ایف بی آئی نے دونوں حملوں کو دہشت گردانہ کارروائیاں قرار دیتے ہوئے تحقیقات شروع کر دی ہیں۔

دو ہفتوں کے دوران دہشت گردی کے چار واقعات

امریکہ میں حالیہ دو ہفتوں کے دوران دہشت گردی کے چار واقعات پیش آئے، جن کے بعد حملہ آوروں کے پس منظر سے متعلق تفصیلات سامنے آئی ہیں۔

رپورٹس کے مطابق آسٹن میں فائرنگ کے واقعے میں ملوث دہشت گرد سینیگال سے تعلق رکھنے والا شخص تھا جس نے بعد میں امریکی شہریت حاصل کی تھی۔

نیویارک شہر میں بم حملے میں ملوث دہشت گرد ترکی اور افغانستان سے تعلق رکھنے والے ایسے خاندانوں کے بچے تھے جن کے والدین نے بعد میں امریکی شہریت حاصل کی تھی۔

اولڈ ڈومینین میں فائرنگ کے واقعے کا دہشت گرد سیرا لیون سے تعلق رکھنے والا شخص تھا جس نے بعد میں امریکی شہریت حاصل کی تھی۔

مشی گن میں یہودی عبادت گاہ پر حملے میں ملوث دہشت گرد لبنان سے تعلق رکھنے والا قانونی طور پر امریکہ میں مقیم تارکِ وطن تھا۔

رپورٹس کے مطابق چاروں حملہ آور مسلمان پس منظر رکھنے والے شہری تھے۔

یاد رہے کہ امریکہ میں دو ہفتوں کے دوران دہشت گردی کے یہ چار واقعات رونما ہوئے، جن کے بعد سکیورٹی اور امیگریشن سے متعلق بحث میں شدت آ گئی ہے، جبکہ مختلف ادارے مزید تحقیقات جاری رکھے ہوئے ہیں۔