امریکی و اسرائیلی حملے میں سابق ایرانی وزیر خارجہ کمال خرازی ہلاک

تہران (ڈیلی اردو) امریکا اور اسرائیل کے مشترکہ حملے میں ایران کے سابق وزیر خارجہ ڈاکٹر کمال خرازی زخموں کی تاب نہ لاتے ہوئے ہلاک ہوگئے۔

رپورٹس کے مطابق تہران میں واقع ان کے گھر کو نشانہ بنایا گیا، جس کے نتیجے میں ان کی اہلیہ بھی ہلاک ہو گئیں، جبکہ ڈاکٹر کمال خرازی کو شدید زخمی حالت میں اسپتال منتقل کیا گیا تھا جہاں وہ کوما میں تھے اور بعد ازاں دم توڑ گئے۔ ایرانی معتبر ذرائع نے ان کی ہلاکت کی تصدیق کر دی ہے۔

ڈاکٹر کمال خرازی ایران کی سفارتکاری اور تعلیم کے شعبے کی ایک اہم شخصیت تھے۔ وہ موجودہ سپریم لیڈر مجتبیٰ خامنہ ای اور سابق سپریم لیڈر علی خامنہ ای کے مشیر بھی رہ چکے تھے۔

81 سالہ ڈاکٹر کمال خرازی 1997 سے 2005 تک صدر محمد خاتمی کے دور میں ایران کے وزیر خارجہ رہے اور ملک کی خارجہ پالیسی کی تشکیل میں کلیدی کردار ادا کیا۔ وہ اسٹریٹیجک کونسل برائے خارجہ امور کے سربراہ بھی تھے، جو اعلیٰ قیادت کو خارجہ پالیسی سے متعلق سفارشات فراہم کرتی ہے۔

رپورٹس کے مطابق وہ پاکستان سے متعلق سفارتی رابطہ کاری کی نگرانی بھی کر رہے تھے، جس کے باعث اس حملے کو سفارتی کوششوں کو سبوتاژ کرنے کی کوشش قرار دیا جا رہا ہے۔

ڈاکٹر کمال خرازی ایک ممتاز سفارتکار اور ماہر تعلیم تھے اور متعدد کتابوں کے مصنف بھی تھے۔