ایرانی بیلسٹک میزائل حملوں کے باعث دبئی میں ایسٹر کی دعائیہ تقریبات منسوخ

دبئی (ڈیلی اردو) مشرق وسطیٰ میں جاری جنگ کے باعث دبئی میں ایسٹر کی تمام دعائیہ تقریبات منسوخ کردی گئی ہیں۔ یہ اعلان متحدہ عرب امارات میں موجود دو کیتھولک گرجا گھروں نے جمعہ کے روز اپنی ویب سائٹس پر کیا۔

سینٹ فرانسس آف ایسیزی چرچ نے اپنی ویب سائٹ پر جاری بیان میں کہا کہ حکومتی ہدایات کے مطابق ’’ہمارے چرچ میں تمام ماسز (دعائیہ تقاریب) اگلے اعلان تک منسوخ کر دی گئی ہیں۔‘‘

دبئی کا ساحلی علاقہ جبل علی کئی بار ایران کی جانب سے پڑوسی خلیجی ممالک پر داغے گئے بیلسٹک میزائلوں اور ڈرون حملوں کی زد میں آ چکا ہے۔ یہ حملے 28 فروری کو شروع ہونے والی اسرائیل اور امریکہ کی کارروائیوں کے جواب میں کیے گئے۔

اعلان میں مزید کہا گیا، ’’عقیدت مندوں سے درخواست ہے کہ اپنی حفاظت اور کمیونٹی کی فلاح کے پیش نظر چرچ کے احاطے میں آنے سے گریز کریں۔‘‘

سینٹ میریز کیتھولک چرچ نے بھی اپنی ویب سائٹ پر اسی طرح کا اعلان جاری کیا اور بتایا کہ دعائیہ تقریب چرچ کے یو ٹیوب چینل پر براہِ راست نشر کی جائے گی۔