ایرانی دھمکیوں کے بعد امریکی وزیر خزانہ اسکاٹ بیسنٹ گھر چھوڑ کر فوجی اڈے منتقل

واشنگٹن(ڈیلی اردو) امریکہ کے وزیر خزانہ اسکاٹ بیسنٹ نے مبینہ ایرانی دھمکیوں کے پیش نظر اپنا گھر چھوڑ کر فوجی اڈے پر رہائش اختیار کرلی ہے۔ امریکی اخبار نیویارک ٹائمز نے باخبر ذرائع کے حوالے سے بتایا ہے کہ بیسنٹ کی جان کو لاحق خطرات کے بعد ان کی رہائش اور سکیورٹی کے انتظامات تبدیل کیے گئے ہیں۔

رپورٹ کے مطابق یہ واضح نہیں کہ ایرانی دھمکیوں کی نوعیت اور شدت کتنی سنگین ہے، تاہم امریکی حکام نے اس حوالے سے سکیورٹی خدشات کا اظہار کیا ہے۔ امریکی محکمہ خزانہ نے اس معاملے پر نیویارک ٹائمز کی جانب سے مؤقف جاننے کی درخواست کا فوری جواب نہیں دیا۔

امریکی خبر رساں ادارے رائٹرز کے مطابق ٹرمپ انتظامیہ کے ایک سینئر انٹیلی جنس عہدیدار نے اکتوبر کے آخری ہفتے میں ایک خفیہ یادداشت میں خبردار کیا تھا کہ ایران نے امریکی اہلکاروں کو نشانہ بنانے کی کوششیں تیز کردی ہیں اور امریکی شہریوں کے خلاف مبینہ مہلک منصوبہ بندی بھی پیش رفت کے مراحل میں پہنچ چکی ہے۔

رپورٹس میں یہ بھی بتایا گیا ہے کہ امریکی حکام کے نزدیک ایران کی امریکہ اور بیرون ملک بڑے پیمانے پر حملے کرنے کی صلاحیت محدود ہے، تاہم انفرادی اہداف کو نشانہ بنانے سے متعلق خطرات کو نظرانداز نہیں کیا جا رہا۔ ایران ماضی میں امریکی سرزمین پر حملوں یا امریکی حکام کو نشانہ بنانے کی منصوبہ بندی کے الزامات کی تردید کرتا رہا ہے۔

اسکاٹ بیسنٹ صدر ڈونلڈ ٹرمپ کی حکومت میں ایران کے خلاف اقتصادی دباؤ کی مہم میں اہم کردار ادا کر رہے ہیں۔ امریکی محکمہ خزانہ نے ان کی قیادت میں تہران کے خلاف مالیاتی پابندیوں، ایرانی تیل کی تجارت اور ان مالیاتی نیٹ ورکس کو نشانہ بنانے کے اقدامات کیے ہیں جنہیں واشنگٹن ایرانی حکومت کی آمدنی کے ذرائع قرار دیتا ہے۔

دوسری جانب برطانیہ میں امریکی فوجی تنصیبات کے حوالے سے بھی سکیورٹی خدشات سامنے آئے ہیں۔ عالمی میڈیا کے مطابق 9 اور 10 نومبر کے دوران برطانیہ کے فضائی اڈے آر اے ایف ملڈن ہال سے متعدد امریکی فوجی طیارے دوسری تنصیبات پر منتقل کیے گئے۔ ان میں تقریباً 10 کے سی 135 فضائی ایندھن بھرنے والے طیارے اور تین اوسپرے طیارے شامل تھے۔ فضائی نگرانی کے اعداد و شمار کے مطابق بعض طیارے جرمنی اور اسپین جبکہ دیگر برطانیہ کے مختلف اڈوں پر منتقل کیے گئے۔

امریکی طیاروں کی اس منتقلی کے بارے میں وال اسٹریٹ جرنل نے بھی ایران سے متعلق ممکنہ خطرے کی اطلاع دی تھی، تاہم امریکی اور برطانوی حکام نے کسی مخصوص حملے کی تفصیلات یا طیاروں کی منتقلی کی حتمی وجہ کی تصدیق نہیں کی۔ برطانوی حکام نے کہا ہے کہ فوجی تنصیبات کی سکیورٹی مسلسل زیرِ نگرانی ہے۔

یہ پیش رفت امریکہ اور ایران کے درمیان جاری جنگ اور کشیدگی کے تناظر میں سامنے آئی ہے۔ 28 فروری کو شروع ہونے والی امریکی اور اسرائیلی جنگی کارروائیوں کے بعد دونوں ممالک کے درمیان محاذ آرائی مزید شدت اختیار کر گئی تھی۔ اس دوران ایران کے خلاف فوجی حملوں کے ساتھ اقتصادی پابندیوں اور علاقائی سکیورٹی اقدامات میں بھی اضافہ ہوا ہے۔

تاہم امریکی حکام کی جانب سے ایرانی دھمکیوں کی تفصیلات عام نہ کیے جانے اور تہران کی مسلسل تردید کے باعث اسکاٹ بیسنٹ کو موصول ہونے والے خطرات کی اصل نوعیت تاحال غیر واضح ہے۔