ایرانی وزیر خارجہ عباس عراقچی اسلام آباد پہنچ گئے، اعلیٰ حکام سے ملاقاتیں

تہران/اسلام آباد (ڈیلی اردو) ایران کے سرکاری خبر رساں ادارے ‘ارنا’ کے مطابق وزیر خارجہ عباس عراقچی عمان کے ایک روزہ دورے کے بعد دوبارہ اسلام آباد پہنچ گئے ہیں۔

عباس عراقچی سنیچر کو اسلام آباد سے عمان گئے تھے، جہاں انہوں نے اتوار کو مسقط میں عمان کے سلطان سمیت دیگر حکام سے ملاقاتیں کیں۔ شیڈول کے مطابق وہ اسلام آباد میں مزید ملاقاتوں کے بعد ماسکو روانہ ہوں گے۔

اس سے قبل اسلام آباد آمد پر ایرانی وزیر خارجہ نے وزیر اعظم شہباز شریف، فیلڈ مارشل عاصم منیر اور نائب وزیر اعظم اسحاق ڈار سے ملاقاتیں کی تھیں۔

دوسری جانب ایرانی وزیر خارجہ نے اسلام آباد میں فیلڈ مارشل عاصم منیر سے بھی ملاقات کی، جس میں علاقائی صورتحال اور دوطرفہ تعلقات پر تبادلہ خیال کیا گیا۔

پاکستان میں تعینات ایرانی سفیر رضا امیری مقدم نے کہا ہے کہ ایرانی وفد کا دورۂ پاکستان دوطرفہ تعلقات کے جائزے اور علاقائی صورتحال پر مشاورت کے لیے تھا اور یہ دورہ کامیابی سے مکمل ہوا۔

انہوں نے وزیر اعظم شہباز شریف اور فیلڈ مارشل عاصم منیر کا شکریہ ادا کرتے ہوئے کہا کہ خطے میں جنگ کے خاتمے اور پائیدار امن کے قیام کے لیے پاکستان کی کوششیں قابلِ تحسین ہیں۔