ایرانی وفد کی واپسی کے بعد امریکی وفد کا پاکستان دورہ بھی منسوخ

واشنگٹن (ڈیلی اردو/اے پی/اے ایف پی/روئٹرز) امریکی صدر ڈونلڈ ٹرمپ نے ہفتے کے روز کہا کہ انہوں نے اپنے دونوں ایلچیوں وٹکوف اور کشنر کا دورہ پاکستان منسوخ کر دیا ہے۔ 

امریکی صدر کے اس اعلان سے قبل پاکستان کے دورے پر آیا ہوا ایرانی وفد ہفتے کو واپس تہران چلا گیا تھا۔

پاکستان کی ثالثی میں ایران جنگ کے خاتمے کے لیے امریکہ اور ایران کے مابین مذاکرات کے دوسرے دور کو ممکن بنانے کے لیے کوششیں ہفتہ 25 اپریل کو بھی جاری رہیں۔ لیکن ایرانی وزیر خارجہ عباس عراقچی کی قیادت میں جو  وفد جمعرت کی رات اسلام آباد پہنچا تھا، اس نے جمعے اور ہفتے کے روز پاکستانی وزیر اعظم شہباز شریف، وزیر خارجہ اسحاق ڈار اور فوج کے سربراہ فیلڈ مارشل عاصم منیر سے ملاقاتیں کیں، لیکن ساتھ ہی ایران کی طرف سے واضح کر دیا گیا تھا کہ تہران امریکہ کے ساتھ کسی براہ راست مکالمت میں حصہ نہیں لے گا۔

اس پس منظر میں پاکستانی وزیر اعظم شہباز شریف کے ساتھ تقریباﹰ دو گھنٹے کی ملاقات کے بعد ایرانی وزیر خارجہ عباس عراقچی اور ان کا وفد اسلام آباد کے مقامی وقت کے بعد ہفتہ 25 اپریل کی سہ پہر واپس تہران کے لیے روانہ ہو گیا۔

اس وفد کی امریکی صدر ٹرمپ کے دونوں ایلچیوں کے ساتھ ملاقات کا تو کوئی ارادہ نہیں تھا، مگر اس نے پاکستان کی مدد سے امریکی نمائندوں کے ساتھ بالواسطہ بات چیت کے لیے بھی پاکستان میں نہ رکنے کا فیصلہ کیا، کیونکہ جانے سے پہلے ایرانی وفد نے پاکستان کو اس بارے میں تفصیل سے آگاہ کر دیا تھا کہ امن مذاکرات کے حوالے سے تہران کے مطالبات کیا ہیں اور اس کے صدر ٹرمپ کی انتظامیہ کی طرف سے پیش کردہ تجاویز پر تحفظات کیا ہیں۔

صدر ٹرمپ کا اعلان

ایرانی وفد کی پاکستان سے واپسی کے محض چند ہی گھنٹے بعد امریکی صدر ٹرمپ نے نشریاتی ادارے فوکس نیوز کے ساتھ ایک انٹرویو میں واشنگٹن کے مقامی وقت کے مطابق ہفتے کی دوپہر کہا کہ انہوں نے اپنے دونوں ایلچیوں اسٹیو وٹکوف اور جیرڈ کشنر سے کہہ دیا ہے کہ وہ ایرانی حکام کے ساتھ مذاکرات کی غرض سے اب پاکستان کا سفر نہ کریں۔

صدر ڈونلڈ ٹرمپ نے کہا کہ وہ نہیں چاہتے تھے کہ امریکی عہدیداروں کو اس لیے اسلام آباد بھیجیں کہ وہ وہاں بیٹھ کر  بات چیت تو کریں، مگر نتیجہ کچھ بھی نہ نکلے۔

صدر ٹرمپ نے کہا، ’’میں نے ابھی کچھ ہی دیر قبل اپنے مندوبین کو بتا دیا ہے، جو کہ روانگی کی تیاری کر رہے تھے، کہ نہیں، اب آپ 18 گھنٹے کا فضائی سفر کر کے اسلام آباد نہیں جائیں گے۔‘‘

امریکی صدر نے اس انٹرویو میں مذاکرات کے تسلسل کے لیے زیادہ وزن ایران پر ڈالا اور کہا، ’’ہمارے پاس اپنے سارے پتے موجود ہیں۔ وہ جب چاہیں، ہمیں کال کر سکتے ہیں۔ لیکن آپ (وٹکوف اور کشنر) 18 گھنٹے کی پرواز کے بعد صرف اس لیے وہاں نہیں جائیں گے کہ وہاں بیٹھ کر بات چیت تو کریں لیکن نتیجہ کچھ نہ نکلے۔‘‘