ایران امریکہ کے ساتھ ’کھیل‘ نہ کھیلے، امریکی نائب صدر کی وارننگ

واشنگٹن (ڈیلی اردو/اے پی/اے ایف پی/روئٹرز) امریکی نائب صدر جے ڈی وینس نے جمعہ کو ایران کو خبردار کیا ہے کہ وہ امریکہ کے ساتھ ’’کھیل‘‘ نہ کھیلے۔ یہ بات انہوں نے  دونوں ممالک کے درمیان جاری جنگ کے خاتمے کے لیے اسلام آباد کے سفر کے دوران کہی۔

امریکی صدر ڈونلڈ ٹرمپ نے اپنے قریبی ساتھی اور ایران کے ساتھ تنازع پر نسبتاً محتاط مؤقف رکھنے والے وینس کو چھ ہفتے قبل شروع ہونے والی جنگ کے حل کے لیے ذمہ داری سونپی ہے، تاکہ کشیدگی کم کی جا سکے۔

 بیرون ملک فوجی مداخلتوں پر تنقیدی مؤقف رکھنے والے جے ڈی وینس  پاکستان کے دارالحکومت اسلام آباد میں ایران کے ساتھ ثالثی مذاکرات کی قیادت کریں گے۔

ایئر فورس ٹو پر پاکستان روانگی کے دوران انہوں نے کہا، ’’ہم مذاکرات کے منتظر ہیں، میرا خیال ہے کہ یہ مثبت ہوں گے، تاہم دیکھتے ہیں کیا ہوتا ہے۔‘‘

انہوں نے صدر ٹرمپ کا حوالہ دیتے ہوئے کہا، ’’اگر ایرانی نیک نیتی سے مذاکرات کے لیے تیار ہیں تو ہم بھی کھلے دل کے ساتھ آگے بڑھنے کو تیار ہیں۔‘‘ تاہم انہوں نے خبردار کیا، ’’اگر وہ ہمیں دھوکہ دینے کی کوشش کریں گے تو انہیں معلوم ہو جائے گا کہ مذاکراتی ٹیم اس حوالے سے زیادہ لچکدار نہیں ہوگی۔‘‘

وینس نے مزید کہا کہ ٹرمپ نے مذاکرات کے حوالے سے ’’واضح رہنما اصول‘‘ فراہم کیے ہیں، تاہم انہوں نے اس کی مزید تفصیلات بیان نہیں کیں۔ نائب صدر نے اپنے  ہمراہ اسلام آباد کا سفر کرنے والے صحافیوں کے سوالات کا جواب نہیں دیا۔