ایران کیساتھ معاہدہ اسلام آباد میں ہوا تو پاکستان جا سکتا ہوں، امریکی صدر ٹرمپ

واشنگٹن (ڈیلی اردو) امریکی صدر ڈونلڈ ٹرمپ نے کہا ہے کہ ایران نے جوہری ہتھیار حاصل نہ کرنے کے امریکی مطالبے پر آمادگی ظاہر کی ہے اور اگر اسلام آباد میں کوئی معاہدہ ہوتا ہے تو ’وہ شاید خود وہاں جائیں۔‘

جمعرات کو وائٹ ہاؤس کے باہر صحافیوں سے گفتگو کرتے ہوئے صدر ٹرمپ نے کہا کہ ایران نے امریکہ کی تقریباً تمام شرائط مان لی ہیں۔

خیال رہے پاکستان امریکہ اور ایران کے درمیان مذاکرات میں بطور ثالث کردار ادا کر رہا ہے، اور گزشتہ ہفتے دونوں کے درمیان بات چیت کا پہلا دور اسلام آباد میں ہوا تھا۔

گفتگو کے دوران ایک صحافی نے امریکی صدر سے سوال کیا کہ آیا وہ ایران کے ساتھ معاہدے پر مہر ثبت کرنے پاکستان جائیں گے، تو ان کا کہنا تھا: ’اگر معاہدے پر دستخط اسلام آباد میں ہوتے ہیں تو شاید میں چلا جاؤں۔‘

انہوں نے مزید کہا: ’پاکستان میں فیلڈ مارشل اور وزیرِ اعظم بہترین لوگ ہیں، شاید میں وہاں چلا جاؤں۔‘

ایران یا امریکہ کی جانب سے مذاکرات کے دوسرے دور کی تاریخ کا اعلان نہیں کیا گیا، تاہم صدر ٹرمپ کا کہنا ہے کہ ’ہم ایران کے ساتھ معاہدہ کرنے کے بہت قریب ہیں۔‘

انہوں نے کہا کہ ایران 20 برس تک جوہری ہتھیار حاصل نہیں کرے گا، تاہم ساتھ ہی یہ بھی کہا کہ وہ کسی مخصوص مدت کی حد کو نہیں مانتے۔

’یہ ایک اچھا معاہدہ ہوگا جس میں جوہری ہتھیار شامل نہیں ہوں گے، اور ایران کے پاس جوہری ہتھیار نہیں ہوگا۔‘

دوسری جانب ایران کی جانب سے تاحال ان بیانات پر کوئی باضابطہ ردعمل سامنے نہیں آیا ہے۔