جنوبی وزیرستان کے مختلف علاقوں میں کل کرفیو، بازار اور اہم شاہراہیں بند رہیں گی

جنوبی وزیرستان(ڈیلی اردو) خیبرپختونخواہ کے شورش زدہ قبائلی ضلع جنوبی وزیرستان میں ضلعی انتظامیہ نے جنوبی وزیرستان لوئر اور اپر کے مختلف علاقوں میں ہفتہ 5 ستمبر کو سیکیورٹی صورتحال کے پیش نظر کرفیو نافذ کرنے کا اعلان کردیا ہے۔ اس حوالے سے باقاعدہ نوٹیفکیشن بھی جاری کردیا گیا ہے۔

انتظامیہ کے مطابق کرفیو صبح 6 بجے سے شام 7 بجے تک نافذ رہے گا۔ جنوبی وزیرستان لوئر میں وانا کی تحصیل کے بعض علاقوں، وانا بازار، بائی پاس اور متعدد اہم راستے کرفیو کی پابندیوں میں شامل ہوں گے۔

اسی طرح جنوبی وزیرستان اپر کی تحصیل سرویکئی اور سراروغہ میں بھی مقررہ اوقات کے دوران کرفیو نافذ رہے گا، جبکہ متعلقہ علاقوں کے بازار اور مارکیٹس بھی بند رہیں گی۔

نوٹیفکیشن کے مطابق کرفیو کے دوران عام شہریوں کی ہر قسم کی نقل و حرکت پر پابندی ہوگی، تاہم صرف منظور شدہ ہنگامی آمدورفت کی اجازت دی جائے گی۔ ایسی نقل و حرکت کے لیے پولیس یا سیکیورٹی فورسز سے پیشگی اجازت لینا ضروری ہوگا۔

انتظامیہ نے شہریوں کو ہدایت کی ہے کہ ناگزیر ہنگامی سفر کی صورت میں شناختی کارڈ اور گاڑی کے ضروری کاغذات اپنے ہمراہ رکھیں۔ سیکیورٹی اہلکاروں کی موجودگی میں گاڑیوں کو مقررہ فاصلے پر روکنے اور اہلکاروں کی ہدایات پر عمل کرنے کی بھی ہدایت کی گئی ہے۔

ضلعی انتظامیہ نے واضح کیا ہے کہ کرفیو کی خلاف ورزی کرنے والے افراد ذمہ دار ہوں گے اور خلاف ورزی کی صورت میں قانونی کارروائی کا سامنا کرنا پڑ سکتا ہے۔

Hashtags: