جنگ بندی خارج از امکان، حزب اللہ کو ختم کرنا مقصد ہے، اسرائیلی وزیراعظم

یروشلم (ڈیلی اردو) اسرائیل کے وزیرِ اعظم بنیامین نیتن یاہو نے اپنے ملک کے شمالی علاقے کے عوام کو مخاطب کرتے ہوئے کہا ہے کہ ’لبنان میں جنگ بندی نہیں ہوئی ہے۔‘

ان کا کہنا تھا کہ ’ہم حزب اللہ پر پوری طاقت کے ساتھ حملے کر رہے ہیں اور آپ کی سکیورٹی بحال ہونے تک رُکیں گے نہیں۔‘

اسرائیلی وزیرِ اعظم کے مطابق ان کا مقصد حزب اللہ کو غیر مسلح کرنا اور ’اسرائیل اور لبنان کے درمیان ایک تاریخی اور دیرپا امن معاہدے کا حصول ہے۔‘

وزیرِ اعظم بنیامین نیتن یاہو کا بیان ایک ایسے وقت میں سامنے آیا ہے جب کچھ دیر پہلے امریکی صدر ڈونلڈ ٹرمپ کہہ چکے ہیں کہ ایران کے ساتھ مذاکرات کے دوران اسرائیل لبنان پر حملوں میں ’کمی‘ کرے گا۔

اسرائیل کے وزیرِ اعظم نیتن یاہو نے کہا ہے کہ اسرائیل کے لیے ’جہاں بھی ضروری ہوا‘ حزب اللہ کے خلاف حملے جاری رکھے گا۔

اسرائیل کا موقف ہے کہ جنگ بندی میں لبنان میں شامل نہیں ہے، تاہم ایران کا کہنا ہے کہ لبنان کے خلاف اسرائیل کے مسلسل حملے معاہدے کی سنگین خلاف ورزی کے مترادف ہیں۔

نیتن یاہو کا کہنا ہے کہ ’ہمارا پیغام واضح ہے کہ جو بھی اسرائیلی شہریوں کے خلاف کارروائی کرے گا اسے نشانہ بنایا جائے گا۔‘

اُن کا کہنا تھا کہ جب تک ہم اپنے شمالی علاقوں میں سکیورٹی مکمل طور پر بحال نہیں کر لیتے، ہم حزب اللہ کو جہاں بھی ضروری ہوا نشانہ بنائیں گے۔

نیتن یاہو کا یہ بیان اسرائیلی فوج کی جانب سے حزب اللہ کے سیکریٹری جنرل نعیم قاسم کے بھتیجے اور علی یوسف حرشی کی ہلاکت کے اعلان کے بعد آیا ہے۔