خانیوال: صحافی عامر حسینی پر ہونے والے قاتلانہ حملے کا مقدمہ درج

خانیوال (ڈیلی اردو) خانیوال پولیس نے صحافی عامر حسینی پر چک 9 ونوئی میں پیر کو ہونے والے قاتلانہ حملے کا مقدمہ پولیس اسٹیشن مخدوم پور پہوڑاں میں درج کر لیا ہے۔

تفصیلات کیمطابق معروف صحافی دانشور تجزیہ نگار عامر حسینی اور اس کے ساتھی مقامی صحافیوں راشد رحمانی، طارق حنیف پر اتوار کے روز چک 9 ونوئی کے قریب مقبول گجر نے نامعلوم ساتھیوں کے ساتھ قاتلانہ حملہ کیا لیکن بروقت اہل علاقہ کے جمع ہونے پر قتل کی دھمکیاں دیتے اور آتشیں اسلحہ لہراتے ہوئے موقع سے فرار ہوگئے۔

وقوعے کے بعد متعلقہ تھانہ مخدوم پور پہوڑاں میں اندراج مقدمہ کیلئے تحریری درخواست دی گئی لیکن جب پولیس مقدمہ درج کرنے میں گریزاں دکھائی دی تو ملک بھر کے صحافتی سیاسی سماجی حلقوں کی جانب سے احتجاج کیا گیا جس پر گزشتہ روز سوموار کو ڈی ایس پی صدر سرکل خانیوال کے دفتر میں وقوعے سے متعلق انکوائری کی گئی اور بعد از انکوائری 24 گھنٹے کی تاخیر سے ایف آئی آر نمبری 100/20 درج کر لی گئی ہے۔

قانونی ماہرین کے مطابق پولیس نے دباؤ کے تحت ملزمان کو سپورٹ کرنیوالی قابل ضمانت دفعات لگائی ہیں۔ عامر حسینی نے خدشہ ظاہر کیا ہے کہ چونکہ شناخت ہونیوالا ملزم پولیس ٹاوٹ ہے اور اس کے رشتہ دار پولیس ملازم ہیں اس لئے ایف آئی آر میں 506 بی کی دفعہ شامل نہیں کی۔

پاکستان سمیت دنیا بھر سے صحافتی تنظیموں اور شخصیات نے عامر حسینی کے ساتھ اظہار یکجہتی کرتے ہوئے وزیر اعلی پنجاب سے مطالبہ کیا ہے کہ ملزمان کو گرفتار کر کے ان کی طرف سے لہرائے گئے آتشیں اسلحہ کی برآمدگی سمیت منصفانہ غیر جانبدرانہ تفتیش کو یقینی بنانے کیلئے خانیوال پولیس کو خصوصی ہدایات جاری کریں۔