خانیوال میں راولپنڈی کار بم دھماکے کا ماسٹر مائنڈ ہلاک، تین فرار

خانیوال (ڈیلی اردو) کاؤنٹر ٹیررازم ڈیپارٹمنٹ (سی ٹی ڈی) ملتان نے خانیوال میں مقابلے کے دوران ایک دہشتگرد کو ہلاک کر دیا جبکہ تین فرار ہوگئے۔

سی ٹی ڈی ترجمان کے مطابق صوبہ پنجاب کے ضلع خانیوال میں دہشتگردوں سے فائرنگ کا تبادلہ ہوا جس میں ایک دہشتگرد مارا گیا اور تین فرار ہونے میں کامیاب ہوگئے۔

https://twitter.com/ShabbirTuri/status/1623569908570415105?t=6eNbMoHsKbwO70YUOs3-Ow&s=19

ہلاک دہشتگرد کی شناخت کالعدم تحریک طالبان پاکستان (ٹی ٹی پی) کمانڈر عرفان اللہ کے نام سے ہوئی ہے جو راولپنڈی کار بم دھماکے کا ماسٹر مائنڈ تھا۔

سی ٹی ڈی کے ترجمان کے مطابق ہلاک ہونیوالے دہشتگرد عرفان اللہ کا تعلق قبائلی ضلع کرم سے تھا، ملزم ایف سی اہلکاروں کے قتل میں بھی ملوث تھا۔

ترجمان کا مزید کہنا ہے کہ دہشتگرد حساس تنصیبات اور اہم شخصیات کو نشانے بنانے کا منصوبہ بنا رہے تھے، ہلاک دہشتگرد کے قبضے سے خودکش جیکٹ، گرنیڈ اور اسلحہ برآمد ہوا ہے۔

سی ٹی ڈی نے گزشتہ روز کراچی کے علاقے کورنگی انڈسٹریل ایریا میں اہم کارروائی کرتے ہوئے کالعدم تنظیم داعش کا اہم کمانڈر گرفتار کیا جس نے دوران تفتیش کئی انکشافات کیے۔

ملزم 2011 سے داعش ملا عبدالمنان گروپ سے وابستہ ہے اور افغان شہریت کا حامل ہے جبکہ عرصہ دراز سے کراچی میں مقیم ہے۔ ملزم رمضان المبارک میں چندہ اکٹھا کرتا ہے اور جمع شدہ چندہ افغانستان میں داعش کو بھجواتا ہے۔

گرفتار ملزم حوالہ ہنڈی کے ذریعے بھاری رقم افغانستان بھیج چکا ہے۔ سی ٹی ڈی حکام کو ملزم کے موبائل فون سے اہم معلومات ملی ہیں۔