ساہیوال: راستہ کے تنازع پر سید برادری کے دو گروپوں میں تصادم، 3 افراد ہلاک، 4 زخمی

ساہیوال (ڈیلی اردو) صوبہ پنجاب کے ضلع ساہیوال کے نواحی علاقہ ہڑپہ کے چک نمبر 10/2 ایل میں راستہ کے تنازعہ پر سید برادری کے دو گروپوں میں جھگڑا کے بعد فائرنگ ہوئی جس کے نتیجے میں 3 افراد ہلاک اور 4 زخمی ہو گئے۔

تفصیلات کے مطابق سید برادری کے دو گروپوں میں راستہ کی رنجش چلی آرہی تھی گزشتہ روز راستہ میں مقتول پارٹی نے ہل رکھا ہوا تھا۔ جس پر فریقین میں جھگڑا اور فائرنگ شروع ہو گئی۔ جس کے نتیجہ میں تین افراد 52 سالہ زوار حسین، 56 سالہ سید اسرار حسین اور 40 سالہ رضوان حیدر موقع پر ہی ہلاک ہوگئے جبکہ تین افراد جن میں 20 سالہ محمد کریم عباس، 40 سالہ آفتاب حسین اور 50 سالہ سعید عالم حسین وغیرہ شدید زخمی ہوگئے۔ ہسپتال ذرائع کا کہنا ہے کہ محمد کریم عباس اور آفتاب حسین کی حالت تشویش ناک ہے۔

مقامی پولیس کا کہنا ہے کہ واقعہ راستے میں پڑے ہل نہ اٹھانے پر جھگڑے کے بعد پیش آیا، معمولی نوعیت کے تنازعہ پر طیش میں آ کر شکیل عباس اور انکے بھائی عقیل عباس نے دیگر ملزمان کے ساتھ ملکر فائرنگ کر دی، فائرنگ کے نتیجے میں 3 افراد موقعہ پر ہلاک جبکہ 4 افراد زخمی ہو گئے۔

پولیس کا کہنا ہے کہ لاشوں اور زخمیوں کو ڈی ایچ کیو ہسپتال منقل کر دیا گیا، فائرنگ واقعہ کے بعد ملزمان فرار ہو گئے جنکی گرفتاری کے لیے ٹیمیں تشکیل دے دی ہیں۔

پولیس کا کہنا ہے کہ تھانہ ہڑپہ میں سید عمار رضا ولد سید حسن علی شاہ کی مدعیت میں نامزد ملزمان شکیل عباس، عقیل عباس پسران سید ممتاز حسین، مظفر عباس، ثمر عباس پسران سید گل عباس، طیب مرتضیٰ ولد مرتضٰی شاہ اور اختر عباس ولد حسن شاہ کے خلاف قتل اور دیگر دفعات کے تحت مقدمہ کرلیا گیا ہے۔