سندھ: حیدرآباد میں فائرنگ، کالعدم تنظیم کا مرکزی رہنما شدید زخمی

حیدر آباد (ڈیلی اردو) پاکستان کے صوبہ سندھ کے ضلع حیدرآباد میں فائرنگ کے ایک واقعے میں محمد خالد قادری شدید زخمی ہو گئے۔

پولیس کے مطابق واقعہ تھانہ اے سیکشن کی حدود میں پیش آیا، جہاں موٹرسائیکل سوار مسلح افراد نے کالعدم تنظیم سنی تحریک پاکستان کے مرکزی سینئر نائب صدر محمد خالد قادری کو نشانہ بنایا۔

بتایا گیا ہے کہ محمد خالد قادری کو اس وقت فائرنگ کا نشانہ بنایا گیا جب وہ نمازِ جمعہ ادا کرنے کے بعد مسجد سے باہر نکل رہے تھے۔ حملہ آوروں کی فائرنگ سے انہیں جسم کے مختلف حصوں پر چار گولیاں لگیں، جس کے باعث وہ شدید زخمی ہو گئے۔

پولیس کا کہنا ہے کہ واقعے کی تحقیقات شروع کر دی گئی ہیں اور ملزمان کی تلاش جاری ہے۔