سندھ: یوم علیؑ پر جلوس، محافل شبینہ اور ختم القرآن کے اجتماعات پر پابندی عائد

کراچی (ڈیلی اردو) سندھ حکومت نے یوم علی علیہ السلام کے موقع پر مجالس اور جلوس، محافل شبینہ اور ختم القرآن کے اجتماع پر پابندی کا نوٹیفیکیشن جاری کردیا۔

تفصیلات کے مطابق محکمہ داخلہ سندھ نے 21 رمضان المبارک یوم علی علیہ السلام کے موقع پر جلوس نکالنے پر پابندی عائد کردی جب کہ ہر قسم کے اجتماع محافل شبینہ اور ختم القرآن کے اجتماع کرنے پر بھی پابندی ہوگی۔

محکمہ داخلہ سندھ نے اجتماعات پر پابندی کا باضابطہ نوٹیفکیشن بھی جاری کردیا ہے جس میں کہا گیا ہے کہ رمضان المبارک کےدوران تمام مذہبی اجتماعات پر پابندی برقرار رہے گی، محافل شبینہ، جلوس و مجالس فرض عبادت نہیں، لاک ڈاون پابندیوں کے دوران مجالس جلوس نکالنے کی اجازت نہیں ہوگی اور یوم علی کے موقع پر بھی جلوس و مجالس کا انعقاد نہیں کیا جائے گا۔