شیخوپورہ: فیروز والا میں کار پر فائرنگ، 3 افراد جاں بحق

فیروز والا (ڈیلی اردو) پنجاب کے ضلع شیخوپورہ کی تحصیل فیروز والا کے قریب مخالفین کی فائرنگ کے نتیجے میں کار میں سوار 3 افراد جاں بحق ہو گئے۔

تفصیلات کے مطابق مقتولین تحصیل فیروز والا کی عدالت سے پیشی کے بعد واپس جا رہے تھے کہ مخالفین کی فائرنگ کا نشانہ بن گئے۔ جس کے نتیجے میں صداقت علی، شبیر حسین اور اسد سرویا موقع پر دم توڑ گئے۔

اطلاعات کے مطابق مقتول صداقت علی جماعت اسلامی وسطی پنجاب کا ڈپٹی جنرل سکریٹری تھا جبکہ گاڑی میں ڈرائیور اور ان کی ساتھ والی سیٹ پر بیٹھا خالد محفوظ رہا۔پولیس کے مطابق قتل کا واقعہ پرانی دشمنی کا نتیجہ ہے۔

ذرائع نے بتایا ہے کہ موٹر سائیکل سوار مخالفین نے کار پر اندھا دھند فائرنگ کر دی جس سے تینوں افراد موقع پر ہی جاں بحق ہو گئے۔

ملزمان فائرنگ کے بعد باآسانی فرار ہونے میں کامیاب ہو گئے، جبکہ علاقے میں خوف و ہراس پھیل گیا۔

پولیس نے جائے وقوع پر پہنچ کر لاشوں کو تحویل میں لیا اور پوسٹ مارٹم کے لیے اسپتال منتقل کر دیا۔

پولیس کی جانب سے واقعے کی تحقیقات شروع کر دی گئی ہیں اور ملزمان کو جلد گرفتار کرنے کی کوشش کی جا رہی ہے۔

آئی جی پنجاب شعیب دستگیر نے واقعے کا نوٹس لیتے ہوئے آر پی او شیخوپورہ سے رپورٹ طلب کرتے ہوئے فوری طور پر ملزمان کو جلد از جلد گرفتار کرنے کا حکم دیا ہے۔