غزہ کے مختلف مقامات پر اسرائیلی طیاروں کی بمباری

غزہ (ڈیلی اردو) فلسطین کے علاقے غزہ کی پٹی پر اسرائیلی جنگی طیاروں کی طرف سے متعدد اہداف پر بمباری کی گئی جس کے نتیجے میں متعدد عمارتوں کو نقصان پہنچا ہے تاہم بمباری کے نتیجے میں کسی قسم کے جانی نقصان کی کوئی اطلاع نہیں ملی۔

مرکز اطلاعات فلسطین کے مطابق صہیونی فوج کے جنگی طیاروں نے ہفتے اور اتوار کی درمیانی شب شمالی غزہ کے مشرقی جبالیا میں متعدد میزائل داغے۔ ان میزائل حملوں کے نتیجے میں غیر معمولی دھماکے ہوئے۔

ادھر مغربی مغزہ میں بھی اسرائیلی فوج نے مزاحمتی مراکز پر بمباری کی تاہم کسی قسم کا جانی نقصان نہیں ہوا ہے۔

ایک فیلڈ آبزرور نے بتایا کہ غزہ کی پٹی میں فلسطینی مزاحمت کاروں کی طرف سے اسرائیلی طیاروں پر شدید فائرنگ کی گئی۔

ہفتے کی شام اسرائیلی فوج نے دعویٰ کیا تھا کہ غزہ کی پٹی سے داغے گئے تین میزائل قریبی یہودی کالونیوں میں گرے ہیں۔

قابض فوج کی طرف سے جاری بیان میں کہا گیا ہے کہ غزی سے داغے گئے میزائل سدیروت کے مقام پر گرے جب کہ دو راکٹ آئرن ڈون نے فضاء ہی میں تباہ کردیے۔