فیصل آباد: یتیم بچے کو زیادتی کے بعد قتل کرنیوالے ملزمان پولیس مقابلے میں ہلاک

فیصل آباد (ڈیلی اردو) تھانہ صدر کے علاقے میں ہونے والے مبینہ پولیس مقابلے میں چودہ سالہ بچے سے زیادتی کے بعد اسے قتل کرکے لاش جلانے والے دو ملزمان اور ان کے دو ساتھیوں سیمت چار ملزمان ہلاک ہوگئےہیں۔

تفصیلات کے مطابق دو روز قبل پولیس نے چودہ سالہ یتیم بچے زین کو زیادتی کے بعد قتل کرکے لاش کو جلانے والے ملزمان کو گرفتار کیا تھا، گذشتہ رات پولیس ملزمان سجاد اور اللہ دتہ کو ہتھیاروں کی برآمد گی کیلیے لے کر جارہی تھی کہ بائی پاس کے قریب چھ سے آٹھ مسلح افراد نے گرفتارملزمان کو چھڑوانے کیلیے پولیس پر فائرنگ کی۔

پولیس کے مطابق حفاظتی اقدامات کے تحت جوابی فائرنگ کی،دوطرفہ فائرنگ رکنے پر چار افراد مردہ حالت میں پائے گئے،مرنے والوں میں بچے کو زیادتی کے بعد قتل کرنے والے دو ملزمان سجاد اور اللہ دتہ بھی شامل تھے،دیگر دو ہلاک افراد کی شناخت عابد اور خالد کے نام سے ہوئی۔

پولیس کے مطابق ہلاک ہونے والے عابد اکتالیس جبکہ خالد تینتالیس ڈکیتی و رہزنی کے مقدمات میں پولیس کو مطلوب تھے،ملزمان دوران ڈکیتی خواتین کو زیادتی کا نشانہ بھی بناتے تھے۔

دوسری جانب پولیس نے گزشتہ رات مبینہ پولیس مقابلے ہلاک ہونے والے چار ملزمان کے خلاف مقدمہ درج کرلیا ہے، ایف آئی آر کے مطابق چار موٹر سائیکلوں پر سوار آٹھ ملزمان نے پولیس پر حملہ کیا۔

ایف آئی آر کے مطابق آلہ قتل برآمد گی سے واپسی پر ملزمان کے ساتھیوں نے حملہ کیا،فائرنگ سے گرفتار دو ملزمان اور ان کے دو ساتھی ہلاک ہوئے،ملزمان کے دیگر ساتھی اندھیرے کا فائدہ اٹھاتے ہوئے فرار ہوگئے۔