لبنان: اسرائیلی حملوں میں ہلاکتوں کی تعداد 826 تک پہنچ گئی

بیروت (ڈیلی اردو/اے ایف پی، روئٹرز) لبنانی حکومت کی طرف سے ہفتہ 14 مارچ کے روز دارالحکومت بیروت میں بتایا گیا کہ ایران کے خلاف امریکہ اور اسرائیل کی جنگ کے دوران اسرائیل نے لبنان میں دو مارچ سے جو فضائی حملے شروع کیے اور جو اب تک جاری ہیں، ان میں ہلاکتوں کی مجموعی تعداد اب 826 ہو گئی ہے۔

بیروت میں لبنانی وزارت صحت نے بتایا کہ اسرائیلی فضائی حملوں یا اسرائیلی فوج کی طرف سے لبنان میں کی جانے والی کارروائیوں میں مارے جانے والوں میں 65 خواتین اور 106 بچے بھی شامل ہیں۔

ساتھ ہی وزارت صحت کی طرف سے بتایا گیا کہ لبنان میں ان اسرائیلی حملوں میں مجموعی طور پر 2,009 افراد زخمی بھی ہوئے۔ اسرائیلی دفاعی افواج کا کہنا ہے کہ وہ حزب اللہ کے ٹھکانوں کو نشانہ بنا رہی ہے، جو اسرائیلی سرزمین پر حملے کر رہی ہے۔

اسرائیل نے ہمسایہ ملک لبنان پر حملے وہاں سے ایران نواز حزب اللہ ملیشیا کی طرف سے تہران حکومت کی حمایت میں اسرائیل پر کیے جانے والے حملوں کے آغاز کے فوراﹰ بعد شروع کیے تھے۔

بیروت میں وزارت صحت کے جاری کردہ ایک بیان میں ہفتے کے روز کہا گیا کہ اسرائیلی حملوں سے لبنان میں ہلاک ہونے والوں میں 31 پیرامیڈیکل یا میڈیکل اہلکار بھی شامل ہیں۔

ان میں وہ 12 میڈیکل ورکرز بھی شامل ہیں،  جو جمعے اور ہفتے کی درمیانی شب جنوبی لبنان میں ایک ہیلتھ کیئر سینٹر پر کیے گئے اسرائیلی فضائی حملے میں مارے گئے۔