لبنان: حزب اللہ اور اسرائیل کی جنگ میں ہلاکتیں 1500 سے تجاوز کر گئیں

بیروت (ڈیلی اردو) لبنانی وزارت صحت کی طرف سے ملکی دارالحکومت بیروت میں منگل سات اپریل کے روز بتایا گیا کہ ایران نواز شیعہ ملیشیا اور اسرائیل کے مابین ایران جنگ کے تناظر میں شروع ہونے والی نئی جنگ میں ہلاکتوں کی تعداد بڑھ کر اب 1500 سے زائد ہو گئی ہے۔

اٹھائیس فروری کو ایران پر امریکہ اور اسرائیل کے فضائی حملوں کے ساتھ شروع ہونے والی ایران جنگ کے آغاز کے چند ہی روز بعد لبنان کی ایران نواز شیعہ ملیشیا حزب اللہ نے بھی اسرائیل پر راکٹ اور میزائل حملے شروع کر دیے تھے، جس کے بعد اسرائیلی فوج نے ہمسایہ ملک لبنان میں حزب اللہ کے خلاف فضائی حملے اور زمینی کارروائیاں شروع کر دی تھیں۔

یہ لڑائی ابھی تک جاری ہے، جس دوران اسرائیل کی طرف سے لبنان میں حزب اللہ کے اہداف پر فضائی حملے بھی کیے جا رہے ہیں اور اسرائیلی فوجی دستے بھی تاحال لبنان کے کئی علاقوں میں موجود ہیں۔

بیروت میں ملکی وزارت صحت نے بتایا کہ اسرائیل اور حزب اللہ کے مابین ایک ماہ سے زیادہ عرصہ قبل شروع ہونے والی جنگ میں لبنان میں ہلاکتوں کی تعداد اب بڑھ کر 1,530 ہو گئی ہے۔

وزارت صحت کے مطابق ان ڈیڑھ ہزار سے زائد مرنے والوں میں 102 خواتین، 130 بچے اور طبی شعبے کے کم ا زکم 57 کارکن بھی شامل ہیں۔

اس کے علاوہ اسرائیل اور حزب اللہ کی اس جنگ کے دوران اب تک 4,812 افراد زخمی بھی ہو چکے ہیں جبکہ جنگ کی وجہ سے بے گھر ہو جانے والے لبنانی شہریوں کی تعداد بھی ایک ملین سے کہیں زیادہ بنتی ہے۔