محرم الحرام: 100 سے زائد علماء پر پابندی عائد کئے جانے کا امکان

لاہور (مانیٹرنگ ڈیسک) محرم الحرام میں امن وامان کو برقرار رکھنے اور مکمل بھائی چارے کے لئے سکیورٹی پلان مرتب کرتے ہوئے ڈویژنل، ضلعی و تحصیل امن اور کور کمیٹیوں کو فعال کرنے فیصلہ کر لیا، ملک بھر سے 100 سے زائد علما کرام کے اپنے اضلاع سے دوسرے اضلاع میں داخلہ پر پابندی عائد کئے جانے کا امکان ہے۔

سرگودھا ریجن کے دو اضلاع سرگودھا اور بھکر سمیت 19 اضلاع کو حساس قرار دیتے ہوئے یکم سے 10 محرم تک پاک فوج کی 24 اور رینجرز کی 34 کمپنیوں کی خدمات حاصل کی جا رہی ہیں جبکہ یکم سے 10 محرم تک پنجاب میں ڈبل سواری پر پابندی عائد ہوگی۔ اسی طرح 9 اور 10 محرم کو موبائل سروس جلوس کے راستوں پر معطل رکھنے کے لئے اقدامات کئے جا رہے ہیں۔

حکومت نے ملک بھر کے ڈویژنل و ضلعی افسران کو محرم الحرام کے حوالے سے سکیورٹی پلان، علماء کرام و ذاکرین کے داخلہ پابندی، امن کمیٹیوں اور کور کمیٹیوں کو متحرک کرنے فورتھ شیڈول کی فہرستیں مرتب کرنے، علاقہ کے جلوس اور مجالس کو کٹیگری اے بی اور سی میں تقسیم کرکے فول پروف سکیورٹی اقدامات جبکہ جلوس روٹس کا معائنہ کر کے سڑکوں کے پیچ ورک، سٹریٹ لائٹ سمیت انتظامات کئے جائیں گے، اس حوالے سے سرگودھا میں 49 علماء کرام و ذاکرین کے داخلہ پر پابندی اور 26 شعلہ بیان مقرر کی زبان بندی کے احکامات متوقع ہیں۔