پاراچنار: دھماکوں میں ملوث زینبیون بریگیڈ کا دہشت گرد جھڑپ کے بعد زخمی حالت میں گرفتار

واشنگٹن (ش ح ط ) ‏پاکستان کے شورش زدہ صوبہ خیبر پختونخوا کے قبائلی ضلع کرم کے ہیڈکوارٹر پاراچنار کے نواحی علاقے نستی کوٹ میں آئی ای ڈی دھماکوں میں ملوث ایرانی حمایت یافتہ کالعدم تنظیم زینبیون بریگیڈ سے تعلق رکھنے والے دہشت گرد محمد ولد عاشق حسین کو پولیس نے جھڑپ کے بعد زخمی حالت میں گرفتار کر لیا۔

گرفتار دہشت گرد کو اہم کمانڈر عابد حسین عرف تہران طوری کا قریبی ساتھی بتایا جاتا ہے۔

پولیس کے مطابق ملزم نے گرفتاری سے بچنے کے لیے فائرنگ کی اور فرار ہونے کی کوشش کی، تاہم پولیس نفری نے فوری تعاقب کرتے ہوئے عبداللہ خان کلی پوسٹ کے قریب فائرنگ کے تبادلے کے بعد اسے زخمی حالت میں گرفتار کر لیا۔

ملزم کو فوری طبی امداد کے لیے ڈسٹرکٹ ہیڈکوارٹر ہسپتال پاراچنار منتقل کر دیا گیا ہے جبکہ اس سے مزید تفتیش جاری ہے۔

پولیس کے مطابق اس سے قبل 10 اپریل کو اسی کیس میں ایک اور ملزم مجاہد حسین کو بھی گرفتار کیا جا چکا ہے۔

یاد رہے کہ 28 مارچ کو نستی کوٹ میں 6 سے زائد بارودی دھماکوں میں 2 افراد ہلاک جبکہ متعدد زخمی ہو گئے تھے۔ ہلاک ہونے والے افراد کا تعلق شیعہ کمیونٹی سے بتایا جاتا ہے۔

واضح رہے کہ زخمی حالت میں گرفتار دہشت گرد محمد کا تعلق بھی شیعہ برادری سے ہے۔