پشاور: شور مچانے پر بھتیجی کو فائرنگ کرکے قتل کرنے والا ملزم گرفتار

پشاور (ڈیلی اردو) پشاور میں شور مچانے پر اپنی بھتیجی کو قتل کرنے والے ملزم کو پولیس نے قبائلی ضلع خیبر سے گرفتار کرلیا۔ ایس ایچ او ابراہیم شنواری کے مطابق ملزم فضل حیات کو لنڈی کوتل کالج کے قریب ایک مکان پر چھاپے کے دوران گرفتار کیا گیا۔

واقعہ پشاور کے علاقے تہکال میں پچھلے ہفتے پیش آیا تھا، جہاں چچا فضل حیات نے شور مچانے پر گھر کی بالائی منزل سے فائرنگ کر دی تھی۔

فائرنگ کی زد میں آ کر 7 سالہ بچی ایشال موقع پر جاں بحق ہوگئی تھی، بچی کے قتل کے واقعے کی ویڈیو سوشل میڈیا پر وائرل ہو گئی تھی۔

پولیس نے بچی کے قاتل چچا کو لنڈی کوتل سے گرفتار کرلیا ہے۔

پولیس کا کہنا ہے کہ واردات کے بعد سفاک قاتل گھر چھوڑ کر فرار ہوگیا تھا جسے سرچ آپریشن کرکے گرفتار کیا گیا۔

اہلخانہ کے مطابق ملزم کو کسی بھی قسم کا ذہنی مسئلہ نہیں تھا جبکہ ابتدائی تفتیش سے معلوم ہوا ہے کہ بھائیوں کے درمیان بھی کسی قسم کا تنازع نہیں تھا۔