پشاور میں دھماکا، پولیس اہلکاروں سمیت 5 افراد زخمی

اسلام آباد (ش ح ط) خیبر پختونخوا کے مرکزی شہر پشاور کے تجارتی مرکز رامپورہ گیٹ میں زوردار دھماکا ہوا ہے جس کے نتیجے میں 5 افراد زخمی ہوگئے جن میں 2 ٹریفک پولیس اہلکار بھی شامل ہیں۔

واقعے کے بعد سیکیورٹی فورسز نے علاقے کو گھیرے میں لے لیا اور زخمیوں کو لیڈی ریڈنگ ہسپتال منتقل کردیا گیا جہاں انہیں طبی امداد فراہم کی گئی۔ ہسپتال حکام کے مطابق زخمیوں کی حالت خطرے سے باہر ہے۔

سیکیورٹی اداروں نے علاقے کو گھیرے میں لیکر سیل کر دیا، دھماکے سے 3 موٹر سائیکلوں کو نقصان پہنچا۔

ایڈیشنل انسپکٹر جنرل شفقت ملک نے بتایا کہ جائے وقوعہ سے شواہد اکٹھے کرلیے گئے ہیں، دھماکا ریموٹ کنٹرول تھا اور بم دیسی ساخت کا تھا جسے موٹرسائیکل میں نصب کیا گیا تھا۔ دھماکے میں دو کلو بارودی مواد استعمال کیا گیا۔

اے آئی جی شفقت ملک کے مطابق حملے میں بظاہر پولیس کو نشانہ بنایا گیا ہے اور مزید تحقیقات جاری ہیں۔

دوسری جانب کالعدم تنظیم حزب الاحرار کے ترجمان ڈاکٹر عبدالعزیز یوسفزئی نے اپنے ایک بیان میں پشاور بم حملے کی ذمہ داری قبول کرلی ہے۔