پنجاب حکومت نے یوم علیؑ کے موقع پر جلوس پر پابندی عائد کر دی، نوٹیفیکیشن جاری

لاہور (ڈیلی اردو) پنجاب حکومت نے رمضان کے آخری عشرہ اور یوم علی علیہ السلام کے موقع پر صوبہ میں ہر قسم کے جلوس پر پابندی عائد کردی ہے۔

پنجاب حکومت نے وفاقی وزارت داخلہ کی ہدایات کی روشنی میں رمضان کے آخری عشرہ اور یوم علی علیہ السلام کے موقع پر صوبہ میں ہر قسم کے جلوس پر پابندی عائد کردی۔ ایس او پیز پر سختی سے عملدرآمد کرتے ہوئے امام بارگاہوں اور گھروں میں مجالس کی مشروط اجازت ہوگی۔

جاری کردہ ایس او پیز کے مطابق مجالس زیادہ سے زیادہ ایک گھنٹہ تک جاری رکھی جاسکیں گی۔

رمضان کے آخری عشرہ اوریوم علیؓ کے موقع پر سخت سیکیورٹی یقینی بنانے کی بھی ہدایت کی گئی ہے۔ انتظامیہ مجالس میں وقت کی پابندی پر عمل کرائے گی۔ امام بارگاہوں میں مجالس کا انعقاد صاف فرش پر کیا جائے گا، قالین نہیں بچھائے جائیں گے تاہم امام بارگاہ میں پختہ فرش نہ ہونے کی صورت میں قالین بچھایا جا سکتا ہے۔

محکمہ داخلہ پنجاب نے جاری مراسلہ میں کہا ہے کہ مجالس کے آغاز اور اختتام پر ہجوم اکٹھا نہ ہو۔ امام بارگاہ میں صحن موجود ہونے کی صورت میں مجلس ہال کی بجائے صحن میں منعقد کی جائے۔ بچے، پچاس برس سے کم عمر اور بیمار افراد مجلس میں نہ آئیں۔ مجلس صرف امام بارگاہ کی چار دیواری کے اندر منعقد کی جائے۔

مجلس سے پہلے امام بارگاہ کے فرش کو کلورین سے دھویا جائے۔ مجلس سے قبل قالین پر بھی کلورین کا اسپرے کیا جائے۔ مجلس کے دوران شرکاء اور قطاروں کے درمیان کم از کم 6 فٹ کا فاصلہ ہو۔ احتیاطی تدابیر پر عملدرآمد یقینی بنانے کیلئے ذمہ دار افراد پر مشتمل کمیٹی تشکیل دی جائے۔