پنجگور کے ایڈیشنل سیشن جج گن مین سمیت کوئٹہ سے روانگی کے بعد لاپتہ ہوگئے، رابطہ بھی منقطع

کوئٹہ(ڈیلی اردو) بلوچستان کے شورش زدہ ضلع پنجگور کے ایڈیشنل سیشن جج اسد اللہ رئیسانی کوئٹہ سے پنجگور جاتے ہوئے لاپتہ ہوگئے، جبکہ ان کے ہمراہ موجود گن مین سے بھی رابطہ نہیں ہو رہا۔

ذرائع کے مطابق اسد اللہ رئیسانی بدھ کی صبح اپنی نجی گاڑی میں گن مین کے ہمراہ کوئٹہ سے پنجگور کے لیے روانہ ہوئے تھے، تاہم مقررہ وقت تک پنجگور نہ پہنچنے پر اہل خانہ اور متعلقہ حکام کو تشویش لاحق ہوئی۔

ذرائع کا کہنا ہے کہ جج سے موبائل فون پر آخری رابطہ کلغلی کے مقام پر ہوا، جس کے بعد ان کا فون بند ہوگیا یا رابطہ منقطع ہوگیا۔ اس کے بعد سے ان کی جانب سے پنجگور پہنچنے کی بھی کوئی اطلاع موصول نہیں ہوئی۔

واقعے کی اطلاع ملنے کے بعد اسد اللہ رئیسانی اور ان کے گن مین کی تلاش شروع کردی گئی ہے، جبکہ متعلقہ ادارے جج کی روانگی کے راستے اور ممکنہ مقامات پر معلومات اکٹھی کر رہے ہیں۔

حکام کی جانب سے تاحال یہ واضح نہیں کیا گیا کہ جج اور ان کے گن مین کے ساتھ کیا پیش آیا۔ واقعے کی مزید تفصیلات اور ان کی موجودہ صورتحال کا تعین تلاش اور تحقیقات مکمل ہونے کے بعد ہی ہوسکے گا۔