پولیس افسران اور خاتون جج کو دھمکیاں: عمران خان کے خلاف انسداد دہشتگردی ایکٹ کے تحت مقدمہ درج

اسلام آباد (مانیٹرنگ ڈیسک) سابق وزیراعظم عمران خان کے خلاف انسداد دہشت گردی ایکٹ کے تحت مقدمہ درج کرلیا گیا۔

سابق وزیراعظم کے خلاف اسلام آباد کے تھانہ مارگلہ میں اسلام آباد پولیس کے اعلیٰ افسران و عدلیہ کو دھمکی دینے پر مقدمی درج کیا گیا۔

عمران خان کے خلاف ایف آئی آر انسداد دہشت گردی ایکٹ کے تحت درج کی گئی ہے اور یہ مقدمہ ڈیوٹی مجسٹریٹ علی جاوید کی مدعیت میں درج کیا گیا۔

مقدمے میں سرکاری افسران کو دھمکیاں دینے اور کام سے روکنے کی دفعات شامل ہیں۔

مقدمے کے متن کے مطابق عمران خان نے ایف نائن پارک جلسے میں ایڈیشنل سیشن جج اور پولیس افسران کو ڈرایا دھکمایا اور ان کی تقریر کا مقصد پولیس حکام اور عدلیہ کو دہشت زدہ کرنا تھا۔

ایف آر کے متن میں کہا گیا ہے کہ ڈرانے دھمکانے کا مقصد پولیس افسران اور عدلیہ کو قانونی ذمہ داریاں پوری کرنے سے روکنا تھا۔

مقدمے کے متن کے مطابق عمران خان کی تقریر سے عوام الناس میں بے چینی، بدامنی اور دہشت پھیلی ہے

خیال رہے کہ گزشتہ روز پاکستان تحریک انصاف کے چیئرمین عمران خان نے شہباز گل پر مبینہ تشدد کے خلاف آئی جی اور ڈی آئی جی اسلام آباد پر کیس کرنےکا اعلان کیا تھا اور دوران خطاب عمران خان نے شہباز گل کا ریمانڈ دینے والی خاتون مجسٹریٹ کو نام لیکر دھمکی بھی دی تھی۔

اس حوالے سے اسلام آباد پولیس کا بھی بیان سامنے آیا تھا اور ترجمان نے کہا تھاکہ خاتون افسر اور دیگر پولیس افسران کو دھمکیاں دینا ریاستی اداروں کے خلاف عمل ہے۔

ترجمان کا کہنا تھاکہ اسلام آباد پولیس کو بطور ادارہ ساکھ متاثر کرنے اور متنازع بنانے والوں کے خلاف کارروائی عمل میں لائی جائے گی۔

اس کے علاوہ وزیر داخلہ رانا ثنا اللہ نے بھی قانونی کارروائی کا اعلان کیا تھا جبکہ پیمرا نے بھی عمران خان کے براہ راست خطاب کر پابندی لگا دی ہے۔

پیمرا نے ٹی وی چینلز پر عمران خان کی تقاریر براہ راست نشر کرنے پر پابندی عائد کردی۔ تاہم ٹی وی چینلز ریکارڈ شدہ تقاریر موثر تاخیری نظام کے نفاذ اور پیمرا ضابطہ اخلاق 2015 کی پاسداری کرتے ہوئے نشر کر سکتے ہیں۔ pic.twitter.com/vucXt3Lf0r

— Report PEMRA (@reportpemra) August 21, 2022