چنیوٹ: ربوہ میں گاڑی پر فائرنگ، احمدی برادری کے تین افراد زخمی

چنیوٹ (ڈیلی اردو) پاکستان کے صوبہ پنجاب ک  ضلع چنیوٹ کے علاقے چناب نگر (ربوہ) میں نامعلوم مسلح افراد نے ایک گاڑی پر فائرنگ کر دی، جس کے نتیجے میں تین افراد زخمی ہو گئے، جن میں سے ایک کی حالت تشویشناک بتائی جا رہی ہے۔

تھانہ چناب نگر کے ایک پولیس اہلکار کے مطابق واقعہ اس وقت پیش آیا جب مقامی افراد کی ایک گاڑی علاقے میں گشت کر رہی تھی۔

ابتدائی معلومات کے مطابق دو موٹر سائیکل سوار افراد نے پیٹرولنگ گاڑی کو نشانہ بنایا اور اس پر اندھا دھند فائرنگ کی۔

پولیس کے مطابق گاڑی میں پانچ افراد سوار تھے جن کا تعلق احمدی برادری سے بتایا جا رہا ہے، اور وہ مقامی سطح پر سکیورٹی کے لیے گشت کر رہے تھے۔

واقعے کے بعد پولیس نے علاقے کو گھیرے میں لے کر ملزمان کی تلاش شروع کر دی ہے جبکہ شہر میں ناکہ بندی بھی کر دی گئی ہے، تاہم ابھی تک کوئی گرفتاری عمل میں نہیں آ سکی۔

زخمیوں کو مقامی ہسپتال منتقل کر دیا گیا ہے جہاں ایک شخص کی حالت تشویشناک بتائی جا رہی ہے۔

واضح رہے کہ اس سے قبل بھی ربوہ میں ایک حملے کی کوشش ناکام بنائی گئی تھی جس میں ایک مذہبی عبادت گاہ کو نشانہ بنانے کی کوشش کی گئی تھی۔