کاشانہ اسکینڈل: میری اور میرے خاندان کی جان کو خطرہ ہے، افشاں لطیف کا چیف جسٹس کو خط

لاہور (ڈیلی اردو) کاشانہ اسکینڈل میں اعلیٰ عہدیداروں پر الزامات کی ویڈیوز جاری کرنے کے بعد سابق سپرنٹنڈنٹ افشاں لطیف نے اب چیف جسٹس آف پاکستان کے نام خط لکھ دیا۔

چیف جسٹس آف پاکستان کے نام لکھے گئے خط میں کاشانہ کی سابق سپرنٹنڈنٹ افشاں لطیف نے کہا ہے کہ ادارے میں کم عمر بچیوں کی شادیوں سے متعلق انہوں نے وزرا ءکی مداخلت بارے محکمہ سوشل ویلفئیر اور وزیراعلی کی اطلاعات عامہ کی ٹیم کو آگاہ کیا۔ شفاف انکوائری کا مطالبہ بھی کیا گیا مگر اس کے برعکس انہی پر الزامات لگا دیئے گئے۔

خط میں کہا گیا ہے کہ حکومت پنجاب اور لاہور ہائیکورٹ کے سامنے معاملہ رکھا تو بیان واپس لینے کے لیے انہیں دھمکایا جارہا ہے۔

افشاں لطیف نے کہا ہے کہ ان کا اور ان کے خاندان کا گھر سے باہر نکلنا مشکل ہوگیا ہے، چیف جسٹس آف پاکستان سے اپیل ہے کہ وہ معاملے کا نوٹس لیں اور انہیں اور ان کی فیملی کو سیکیورٹی فراہم کی جائے۔