کرم: پاراچنار میں فائرنگ، ایک شخص ہلاک، لواحقین کا احتجاج

پاراچنار (نمائندہ ڈیلی اردو) پاکستان کے شورش زدہ صوبے خیبر پختونخوا کے قبائلی ضلع کرم کے صدر مقام پاراچنار میں نامعلوم مسلح افراد کی فائرنگ سے ایک شخص ہلاک ہوگیا ہے

ڈیلی اردو کے مطابق پاراچنار میں فائرنگ کے واقعے میں ایک شخص ہلاک ہو گیا، پولیس نے تحقیقات کا آغاز کر دیا ہے۔

ذرائع کے مطابق پاراچنار کے علاقے بوشہرہ میں دریائے کرم کے کنارے نامعلوم افراد کی فائرنگ سے ایک شخص ہلاک ہوا، جس کی شناخت جمشید حسین کے نام سے ہوئی ہے۔ 

پولیس ذرائع کا کہنا ہے کہ جمشید کا تعلق گاؤں مالی خیل سے تھا اور وہ شیعہ کمیونٹی سے تعلق رکھتے تھے۔

واقعے کے بعد لواحقین نے لاش کے ہمراہ احتجاج شروع کر دیا اور حکومت سے ملزمان کے خلاف کارروائی کا مطالبہ کیا۔ پولیس کے مطابق واقعے کی تحقیقات جاری ہیں۔

دوسری جانب سیکیورٹی وجوہات کے باعث ٹل-پاراچنار روڈ کو آج ہر قسم کی ٹریفک کے لیے بند کر دیا گیا ہے، جبکہ علاقے میں خوف و ہراس پایا جا رہا ہے۔