آرمینیا مارکیٹ دھماکا: ہلاکتوں کی تعداد 16 ہوگئی، 17 لاپتہ

یریوان (ڈیلی اردو/شِنہوا) آرمینیا کے دارالحکومت یریوان کے ایک بازار میں ہونیوالے دھماکے سے ہلاک ہونے والے افراد کی تعداد 16 ہو گئی ہے جبکہ سرچ آپریشن ابھی جاری ہے۔

ملک کی وزارت ہنگامی صورتحال نے منگل کے روز ایک بیان میں بتایا کہ مجموعی طور پر 17 افراد بدستور لاپتہ ہیں اور 12 دیگر ہسپتال میں داخل ہیں۔

بیان میں مزید کہا گیا کہ تقریباً 200 فائر فائٹرز، امدادی اہلکار اور 100 رضاکار اب بھی زندہ بچ جانیوالے افراد کی تلاش میں مصروف ہیں۔

حکام کا کہنا ہے کہ آگ پر قابو پا لیا گیا ہے اور ریسکیو آپریشن زور و شور سے جاری ہے۔

اتوار کے روز یریوان کے سورمالو شاپنگ سنٹر میں ایک مہلک دھماکہ ہوا تھا۔ اس سے قبل پیر کے روز وزیر برائے ہنگامی حالات آرمین پمبوچیان نے دھماکہ میں دہشتگردی کا عنصر ملوث ہونے کا امکان مسترد کر دیا تھا۔

مقامی رپورٹس کےمطابق دھماکہ مارکیٹ میں آتش بازی کے سامان کے ایک گودام میں ہوا جس کے بعد بڑے پیمانے پر آگ لگ گئی۔