آزاد کشمیر: میرپور میں اجتماعی زیادتی میں ناکامی پر 3 خواتین کو قتل کرنیوالے 3 ملزمان گرفتار

میرپور (مانیٹرنگ ڈیسک) آزاد کشمیر کے ضلع میرپور میں پولیس نے جنسی زیادتی میں ناکامی پر 3 خواتین کو قتل کرنے والے ملزمان کو گرفتار کرلیا۔

ایس ایس پی ضلع میرپور راجہ عرفان سلیم نے میڈیا سے گفتگو کرتے ہوئے بتایا کہ میرپور پولیس نے رمضان المبارک میں ننھی بچی اور 2 خواتین کے قتل کا سراغ لگا لیا۔ انہوں نے بتایا کہ قتل میں ملوث 3 ملزمان کو گرفتار کرکے مقدمہ درج کرلیا گیا۔

ایس ایس پی نے بتایا کہ گرفتار ملزمان میں ایک رکشہ ڈرائیور اور دو ورکشاپ مکینک ہیں جن کا تعلق کھوئی رٹہ، میرپور اور ایک کا تعلق پنجاب کے ضلع راولپنڈی سے ہے جبکہ ان سے مزید تفتیش جاری ہے۔

راجہ عرفان سلیم نے بتایا کہ ملزمان نے اجتماعی زیادتی کی کوشش میں مزاحمت پر خاتون کو اینٹ مار کر قتل کردیا تھا، ملزمان نے ایک قتل کو چھپانے کیلئے مزید دو قتل کردیے، ملزمان نے قتل کے بعد دو لڑکیوں کی لاشیں گندے نالے میں بہا دی اور تیسری کی گڑھے میں دفنا دی تھی۔

مقتول خواتین اور بچی خانہ بدوش قبیلے سے تعلق رکھتی تھیں جو 19 سال سے منگلا کے نواح میں رہائش پزیر تھیں۔