اسرائیلی فوج کی فائرنگ سے 14 سالہ فلسطینی بچہ ہلاک

الخلیل (ڈیلی اردو) اسرائیلی فوج نے فلسطین کے مقبوضہ مغربی کنارے کے جنوبی شہر الخلیل میں الفوار کیمپ میں گھس کر اندھا دھند فائرنگ کی جس کے نتیجے میں 14 سالہ بچہ ہلاک ہوگیا۔

مرکز اطلاعات فلسطین کے مطابق ہلاک بچے کی شناخت زید فضل القیسہ کے نام سے کی گئی ہے۔ اسرائیلی فوج کے الخلیل شہر میں دھاوے اور ایک معصوم بچے کی ہلاکت کے خلاف مقامی شہری اسرائیل کے خلاف نعرے لگاتے سڑکوں پر نکل آئے۔ الظاھریہ کے مقام پر مشتعل فلسطینی ہجوم اور اسرائیلی فوج کے درمیان تصادم ہوا جس میں 4 فلسطینی اسرائیلی فوج کی گولیوں کا نشانہ بن کر زخمی ہوگئے۔

القیسہ کو شدید زخمی حالت میں ہسپتال منتقل کرنے کی کوشش کی گئی مگر وہ راستے ہی میں دم توڑ گیا۔

مرکز اطلاعات فلسطین کے مطانق قیسہ اپنے والدین کا اکلوتا بیٹا تھا اور وہ طویل عرصے سے الفوار کیمپ میں رہائش پذیر تھے۔

عینی شاہدین نے بتایا کہ قابض فوج کی بھاری نفری نے فلسطینیوں کے گھروں میں گھس کر نہ صرف قیمتی سامان کی توڑپھوڑ اور لوٹ مار کی بلکہ گھروں کو فوجی بیرکوں میں تبدیل کردیا۔