اسلام آباد: شراب فیکٹری پکڑی گئی، ایک ملزم گرفتار

اسلام آباد (ڈیلی اردو) اسلام آباد پولیس نے سیکٹر جی تیرہ ون میں کارروائی کرتے ہوئے شراب کی جعلی فیکٹری کو قبضے میں لے لیا ہے۔

اسلام آباد پولیس کے مطابق تھانہ ترنول پولیس نے سیکٹر جی تیرہ ون میں کارروائی کرتے ہوئے شراب کی جعلی فیکٹری پکڑی، فیکٹری سے انگلش اور مری بیروری کی جعلی شراب کی تیار شدہ 700 بوتلیں اور 500 لیٹر سے زائد الکوحل برآمد کیا گیا، اس کے علاوہ شراب کی سینکڑوں خالی بوتلز، اسیٹکرز اور شراب کشید کرنے والے آلات بھی برآمد کئے گئے۔

تھانہ ترنول پولیس ٹیم نے G-13 میں شراب کی جعلی فیکٹری پر چھاپہ مار کے جعلی شراب کی تیار شدہ 700 بوتلز اور 500 لیٹر سے زائد الکوحل ،بڑی تعداد میں شراب کی خالی بوتلز، سٹکرز اور شراب کشید کرنے والے آلات برآمد کرلئے، ملزم گرفتار کر لیا۔#IslamabadPolice pic.twitter.com/7h8cHU51IL

— Islamabad Police (@ICT_Police) May 23, 2020

پولیس کے مطابق کارروائی میں ایک شخص کو گرفتار کیا گیا، جس کی شناخت عامر گل کے نام سے ہوئی، ملزم کے خلاف مقدمہ درج کرلیا گیا ہے، کارروائی ڈی ایس پی خالد محمود اعوان کی نگرانی میں ایس ایچ او ارشد علی بمعہ ٹیم اسحاق اے ایس آئی نے کی۔

پولیس نے چھاپے سے متعلق مزید بتایا کہ اس فیکٹری میں ملزم کامران عرف کامی بدنام زمانہ ملک برادران سے مل کر جعلی انگلش شراب بھی تیار کرتا تھا، ملزمان بڑی تعداد میں انگلش اور مری بیروری کی جعلی شراب جڑواں شہر اور گردونواح میں سپلائی کرتے تھے۔

وفاقی دارالحکومت پولیس کے مطابق شراب فروش ڈیلر کے دیگر ساتھیوں کی گرفتاری کے لیے چھاپے مارے جا رہے ہیں۔