افغانستان: قندہار میں حافظ گل بہادر گروپ کا اہم کمانڈر 3 ساتھیوں سمیت ہلاک

اسلام آباد (ش ح ط) افغانستان میں نامعلوم افراد کی فائرنگ سے تحریک طالبان پاکستان (ٹی ٹی پی) کا اہم کمانڈر یاسر پراکے تین ساتھیوں سمیت ہلاک ہوگیا۔

افغانستان کے ضلع قندہار میں نامعلوم افراد کی فائرنگ سے حافظ گل بہادر گروپ کا اہم کمانڈر تین ساتھیوں سمیت ہلاک#Kandahar #Afghanistan @Natsecjeff

— Shabbir Hussain Turi (@ShabbirTuri) August 23, 2022

حافظ گل بہادر گروپ نے اپنے کمانڈر کی ہلاکت کی تصدیق کرتے ہوئے پاکستان کی خفیہ ایجنسی پر اس قتل میں ملوث ہونے کا الزام عائد کیا ہے۔

نمائندہ ڈیلی اردو کے مطابق افغانستان کے صوبہ قندہار میں نامعلوم مسلح افراد نے گولیاں مار کر کمانڈر یاسر کو چچا اور بھتیجے سمیت ہلاک کردیا۔ حافظ گل بہادر گروپ نے اپنے کمانڈر کی ہلاکت کی تصدیق کرتے ہوئے پاکستان کی خفیہ ایجنسی پر اس قتل میں ملوث ہونے کا الزام عائد کیا۔

کمانڈر یاسر کا شمار ٹی ٹی پی کے حافظ گل بہادر گروپ کے اہم کمانڈرز میں ہوتا تھا۔

حکومت پاکستان نے کمانڈر یاسر پڑاکے کی سر کی قیمت دو ملین مقرر کی تھی۔

کالعدم تنظیم تحریک طالبان پاکستان سابق ترجمان احسان اللہ احسان نے کہا کہ ‏مجاہدین کی قیادت کو آگاہ کیا تھا کہ وہ آپ کو مذاکرات کے نام پر ورغلا کر اپنی حفاظت سے غافل کریں گے اور پھر چن چن کر ماریں گے۔

آج ایک اور سینئر کمانڈر یاسر جن کا تعلق شمالی وزیرستان سے تھا کو قندھار میں ہلاک کر دیا گیا۔

انہوں نے مزید کہا مذاکراتی ڈرامہ پاکستان مخالف کمانڈرز کو ختم کرنے کا منصوبہ ہے۔

حافظ گل بہادر کون ہیں؟

لگ بھگ پچاس سالہ حافظ گل بہادر کا تعلق شمالی وزیرستان کی تحصیل دتہ خیل کے علاقے مداخیل وزیر سے بتایا جاتا ہے۔ زمانۂ طالب علمی میں ان کا تعلق مولانا فضل الرحمٰن کی جمعیت علمائے اسلام (ف) کے تعلیمی اداروں میں ذیلی تنظیم جماعت طلباء اسلام سے تھا اور وہ اس کے علاقائی سربراہ بھی تھے ۔

سن 2003 اور 2004 میں شمالی اور جنوبی وزیرستان میں عسکریت پسندوں کی کارروائیاں شروع ہوئیں تو اس وقت حافظ گل بہادر کا شمار بھی انتہائی اہم کمانڈروں میں ہونے لگا تھا۔ ان کی سربراہی میں سرکردہ کمانڈروں نے پانچ ستمبر 2006 کو حکومتِ پاکستان کے ساتھ ایک امن معاہدہ بھی کیا تھا جو پندرہ جون 2014 کو عسکریت پسندوں کے خلاف فوجی آپریشن ‘ضرب عضب ‘ شروع ہونے کے بعد ختم ہو گیا تھا۔

فوجی آپریشن شروع ہوتے ہی حافظ گل بہادر اپنے اہم ساتھیوں اور جنگجوؤں سمیت سرحد پار افغانستان چلے گئے تھے جہاں وہ اب تک روپوش ہیں۔

افغانستان میں طالبان کے بر سر اقتدار آنے کے بعد حکومت پاکستان نے کالعدم ٹی ٹی پی کے ساتھ مصالحت کے لیے بات چیت کا سلسلہ شروع کیا ہے لیکن حافظ گل بہادر کی تنظیم کو ان مذاکرات میں اب تک شامل نہیں کیا گیا۔