امریکہ میں ایران کے خلاف ممکنہ فوجی کارروائی پر اعلیٰ سطحی بریفنگ

واشنگٹن (ڈیلی اردو/روئٹرز) ایک امریکی اہلکار نے خبر رساں ادارے روئٹرز کو بتایا ہے کہ امریکی فوج کی اعلیٰ قیادت، بشمول سینٹرل کمانڈ کے کمانڈر ایڈمرل بریڈ کوپر، جمعرات کو بعد ازاں صدر ڈونلڈ ٹرمپ کو ایران کے خلاف ممکنہ فوجی کارروائی سے متعلق تفصیلات پر بریفنگ دے گی۔

اہلکار کے مطابق اس بریفنگ میں امریکی وزیرِ دفاع پیٹ ہیگسیتھ اور جوائنٹ چیفس آف اسٹاف کے چیئرمین جنرل ڈین کین بھی شریک ہوں گے۔ تاہم زیر غور آپشنز کی تفصیلات ظاہر نہیں کی گئیں۔

ذرائع کے مطابق بریفنگ میں اس بات پر توجہ دی جائے گی کہ ایران کو مذاکرات کی میز پر لانے اور تنازع کے خاتمے کے لیے کون سے اقدامات مؤثر ہو سکتے ہیں۔

ادھر امریکی میڈیا رپورٹوں کے مطابق سینٹرل کمانڈ نے ایران پر “مختصر اور طاقتور” فضائی حملوں کی ایک لہر کا منصوبہ بھی تیار کیا ہے، جس میں ممکنہ طور پر بنیادی ڈھانچے کے اہداف شامل ہو سکتے ہیں۔ اس کے ساتھ آبنائے ہرمز کے ایک حصے پر کنٹرول حاصل کرنے اور اسے دوبارہ تجارتی جہاز رانی کے لیے کھولنے کے منصوبے پر بھی غور کیا جا رہا ہے۔

دوسری جانب ایرانی پاسدارانِ انقلاب کی ایرو اسپیس فورس کے کمانڈر بریگیڈیئر جنرل سید ماجد موسوی نے امریکہ کو سخت تنبیہ کرتے ہوئے کہا ہے کہ ایران نے خطے میں امریکی اڈوں کا انجام دیکھا ہے اور اب امریکی طیارہ بردار جہاز بھی ایران کے نشانے پر ہو سکتے ہیں۔