امریکی و نائجیریا مشترکہ آپریشن میں داعش کا عالمی سطح پر دوسرا اہم ترین کمانڈر ہلاک

واشنگٹن/ابوجا (ڈیلی اردو) امریکی صدر ڈونلڈ ٹرمپ اور نائجیریا کے صدر بولا تینوبو نے تصدیق کی ہے کہ امریکی افواج کے ساتھ مشترکہ کارروائی میں شدت پسند تنظیم داعش کا ایک اعلیٰ ترین رہنما ہلاک کر دیا گیا ہے۔

صدر تینوبو نے ہفتے کے روز جاری بیان میں کہا کہ نائجیریا کی مسلح افواج نے امریکی فوج کے تعاون سے ایک جرات مندانہ مشترکہ آپریشن کیا، جس سے داعش کو بڑا دھچکا پہنچا۔

امریکی صدر ڈونلڈ ٹرمپ کے مطابق ابو بلال المینوکی داعش کا عالمی سطح پر دوسرا اہم ترین کمانڈر تھا۔ 

دونوں فریقین نے بتایا کہ وہ رات گئے ہونے والی کارروائی میں ہلاک ہوا، تاہم آپریشن کی درست جگہ اور نوعیت کے بارے میں تفصیلات ظاہر نہیں کی گئیں۔

نائجیریا کی دفاعی افواج نے ابو بلال المینوکی کو داعش کا سینئر رہنما اور عالمی سطح پر سرگرم ترین دہشت گردوں میں سے ایک قرار دیا ہے۔ فوج کے مطابق وہ تنظیم کے میڈیا آپریشنز، معاشی سرگرمیوں، ہتھیاروں، دھماکا خیز مواد اور ڈرون ٹیکنالوجی سے متعلق نیٹ ورکس کی رہنمائی کرتا تھا۔

بیان میں کہا گیا ہے کہ اس کی ہلاکت سے داعش کے عالمی نیٹ ورک کو بڑا نقصان پہنچا ہے، کیونکہ وہ مختلف خطوں میں تنظیم کی منصوبہ بندی اور رابطہ کاری میں مرکزی کردار ادا کر رہا تھا۔

نائجیریا کئی برس سے داعش کی علاقائی شاخوں اور بوکو حرام سمیت مسلح گروہوں کے خلاف کارروائیاں کر رہا ہے، جبکہ ملک میں جرائم پیشہ مسلح گروہوں کے خلاف بھی آپریشنز جاری ہیں۔

امریکہ نے حالیہ مہینوں میں نائجیریا پر شدت پسندوں کے خطرات سے نمٹنے میں ناکامی کے الزامات عائد کیے تھے۔ گزشتہ برس کرسمس کے موقع پر امریکہ نے نائجیریا کے تعاون سے سوکوٹو ریاست میں داعش کے جنگجوؤں کے خلاف فضائی حملے بھی کیے تھے، جس کے بعد واشنگٹن نے نائجیریا میں سینکڑوں فوجی اہلکار تعینات کر کے مقامی فورسز کی تربیت اور معاونت شروع کی۔