ایران منصوبہ پیش کریگا، امریکہ غور کرے گا، صدر ٹرمپ کا انکشاف

واشنگٹن (ڈیلی اردو) امریکی صدر ڈونلڈ ٹرمپ نے کہا ہے کہ ایران ایک منصوبہ پیش کرے گا اور امریکہ اسے دیکھے گا، جبکہ دونوں ممالک کے درمیان موجودہ ایرانی قیادت کے ساتھ رابطے اور مذاکرات جاری ہیں۔

خبر رساں ادارے روئٹرز سے گفتگو کرتے ہوئے صدر ٹرمپ نے کہا کہ ایران بات چیت کرنا چاہتا ہے اور یہ جاننا چاہتا ہے کہ آیا کسی معاہدے تک پہنچا جا سکتا ہے یا نہیں۔

انہوں نے کہا کہ ایران امریکہ کے مطالبات پورے کرنے کے لیے ایک منصوبہ یا پیشکش دینے کا ارادہ رکھتا ہے۔ ٹرمپ کے بقول، “ایران ایک پیشکش کرے گا اور ہم اسے دیکھیں گے۔” تاہم انہوں نے یہ بھی کہا کہ انہیں فی الحال معلوم نہیں کہ اس پیشکش میں کیا شامل ہوگا۔

جب صدر ٹرمپ سے پوچھا گیا کہ امریکہ ایران میں کن افراد سے مذاکرات کر رہا ہے تو انہوں نے نام لینے سے گریز کیا، تاہم کہا کہ واشنگٹن ان لوگوں سے رابطے میں ہے “جو اس وقت اقتدار میں ہیں۔”

امریکی صدر نے مزید کہا کہ اگلے ہفتے برطانیہ کے بادشاہ چارلس کے دورۂ امریکہ کے موقع پر بھی وہ ایران کے معاملے پر بات چیت کریں گے۔

ٹرمپ کے بیان کو ایسے وقت میں اہم قرار دیا جا رہا ہے جب خطے میں کشیدگی برقرار ہے اور ایران، امریکہ اور دیگر علاقائی طاقتوں کے درمیان سفارتی سرگرمیاں تیز ہو چکی ہیں۔ مبصرین کے مطابق اگر ایران کی جانب سے باضابطہ تجویز پیش کی جاتی ہے تو یہ ممکنہ معاہدے یا کشیدگی میں کمی کی جانب اہم پیش رفت ہو سکتی ہے۔